CCI-TL enkoraja emprezáriu timoroan foti responsabilidade hasa’e produsaun rai-laran
DILI, 17 outubru 2024 (TATOLI) – Kamára Komersiu Industria Timor-Leste (CCI-TL-sigla portugés) liuhosi Vise Prezidente ne’ebé trata asuntu agrikola, Rui Castro, enkoraja emprezáriu timoroan hotu atu foti responsabilidade hodi hasa’e produsaun rai-laran.
“Emprezáriu timoroan sira tenke foti responsabilidade, CCI-TL mós tenke foti responsabilidade, ita atu hasa’e produsaun rai-laran la’ós parteGovernu nian de’it, maibé ita hotu nia responsabilidade, ida ne’e mak ami hala’o daudaun ona hanesan responsabilidade,” Rui Castro hateten ba Agência TATOLI iha Faról Dili, ohin.
Durante tinan barak nia laran Agência internasionál barak no Governu hala’o ona demoplot maibé la konsege halo kontinuasaun. Ho nune’e mak iha tinan sira ba kotuk CCI-TL foti inisiativa hodi realiza demoplot no fó duni progresu di’ak.
“Demoplot ami la’o ona, agora hetan ona nia modelu no nia operasaun ne’e la’o oinsá, ami junta hamutuk ideia sira ne’e atu kontribui ona ba investimentu. Agora ami halo ona investimentu no ami nia tarjetu ba 2027 ita tenke hatun ona importasaun foos hodi hasa’e fali foos ita nian rasik mak ami hanaran Mana-Boot,” Castro tenik.
Tuir nia, rai no bee iha Timor-Leste laiha problema no timoroan sira mak ladun utiliza ho di’ak hodi halo produsaun hanesan hare.
“Ita nia rai laiha problema, ita nia bee laiha problema, maibé ita rasik mak la konsege utiliza ita nia rai ho di’ak, utiliza ita nia bee ho di’ak,” nia tenik.
Nia dehan tan, “produsaun hare la’ós ita halo tinan ida dala ida, maibé ita bele halo tinan tomak labele para, demoplot ami prova iha kampu, ami balun hare kuda iha janeiru ba to’o fevereiru, kuda fali iha marsu no abríl ko’a no kontinua nafatin la para durante tinan tomak, laiha razaun mai ita katak hare ne’e ita atu kuda tinan ida dala ida de’it, ita bele kuda iha kualker tempu no sa fulan de’it, bele ko’a mós iha sa fulan de’it”.
Dadaun ne’e, CCI-TL halo ona eskema produsaun atu kontinua produsaun ba oin hodi hasa’e produsaun rai laran liuliu hare.
Rekorda fali katak, iha loron 05 Setembru 2024 CCI-TL, lansa, ona foos ho marka Mana Boot, ne’ebé tuir planu sei fa’an iha merkadu iha tinan oin.
Foos ne’e mai husi rezultadu programa demoplot ne’ebé CCI-TL implementa hamutuk ho agrikultór sira atu hasa’e produsaun ai-han iha rai-laran no hamenus importasaun, ne’ebé hahú iha 2023.
Programa ne’e liuhusi kooperasaun ne’ebé envolve Kámara Komérsiu no Indústria Indónezia no PT. Petrosida Gresik, liuhusi rezultadu enkontru ASEAN ne’ebé akontese iha Labuan Bajo iha tinan kotuk, bainhira Prezidente CCI-TL partisipa mós iha eventu ne’e.
Apoiu ne’ebé CCI-TL halo ne’e la’ós iha foos de’it, maibé bele haree mós iha setór sira seluk. Tanba ne’e, Governu sei fó konfiansa ba setór privadu sira atu serbisu hamutuk hodi lori ekonomia rai ida ne’e ba di’ak liu.
Notisia relevante:CCI-TL introdús foos “Mana Boot” no sei fa’an iha 2025
Jornalista: Hortencio Sanchez
Editór : Florencio Miranda Ximenes
