DILI, 18 Outubru 2024 (TATOLI) – Autoridade Munisípiu Dili (AMD) reforsa kooperasaun ho Uniaun Sidade Kapitál Língua Portugeza (UCCLA, sigla portugés) ba implementasaun programa iha área komérsiu, turizmu, formasaun língua, jestaun finanseira no jardín, informa Prezidente Autoridade Dili, Gregório Saldanha.
Prezidente autoridade ne’e hato’o hafoin fila husi vizita bá Portugál foin lalais ne’e. “Ami bá ne’e reativa de’it akordu sira ne’ebé uluk iha ona. Ita Dili ne’e atu halo sidade amiga. Dili ne’e halo ona akordu sira ne’e ho UCCLA ne’ebé jere apoiu Uniaun Europeia. Iha loron 25 [Outubru] sei iha lansamentu ba loja balkaun únika ba atendimentu públiku. Ida ne’e instituisaun sira iha hotu ne’ebá”, Gregório Saldanha infoma ba Tatoli hafoin entrevista eskluziva iha estúdiu Tatoli, iha Farol.
Autoridade Dili ne’e salienta katak iha akordu UCCLA ne’e sei implementa mós program aba konstrusaun jardín iha mota Maloa nian.
“Ami mós propoin pedidu ida atu halo jardín ida iha semitériu Santa Krús oin. Sira konkorda no orgullu ba ideia ne’e, tanba hakarak ajuda povu no joven loriku asu’ain nia restu luta nian. Tanba iha momentu ne’ebá ami foti Portugál nia naran, ami halo demostrasaun, ami hakerek iha spanduk ‘Portugal onde está a tua responsabilidade?’”. Entaun, depoizde akontesimentu masakre, Portugál hamriik hato’o nia responsabilidade to’o independénsia”, relembra.
Nia salienta katak Portugál no Timor-Leste iha relasaun istorika iha língua, kultur no relijiaun katólika ne’ebé sira lori mai. “Povu maioria hili relijiaun katólika, ne’ebé Portugál ho Timor-Leste nasaun maun-alin, tanba ami presiza apoiu, maibé ida ne’e mós sira dehan sira-nia obrigasaun”.
Tuir prezidente, Portugál presiza apoia Timor-Leste ba iha dezenvolvimentu setór turizmu, tanba nasaun ne’e dependénsia ba petróleu, nune’e ho tulun ne’e bele hamenus nia dependénsia.
Notísia relevante: UCCLA-UE atribui sertifikadu ba formandu hamutuk 110
Jornalista: Jesuína Xavier
Editora: Maria Auxiliadora
