DILI, 29 outubru 2024 (TATOLI)—Fundu Dezenvolvimentu Kapitál Umanu (FDCH, sigla portugés) prevee orsamentu ba tinan 2025 hodi prioriza bolsa estudu ba espesialista iha área oin-oin.
“Ita tinan oin foka no fó prioridade ba espesialista sira iha área oin-oin. Ami fó barak liu ba área ida-ne’e no ami mós fó ba anastesia tanba iha tinan 2003 to’o 2005 ita foin mak iha na’in-lima no tinan 2024 ita haruka tan ema na’in-16. Ida-ne’e signfika katak dadus sei menus loos iha área anastesia,” Diretór Ezekutivu FDCH, Júlio Aparício, informa ba Agência Tatoli, iha ninia knaar fatin, Palásiu Governu, tersa ne’e.
Nia dehan, atu responde ba asuntu ne’e presiza fazeadamente no bazeia ba orsamentu, nune’e labele halo dala-ida de’it tanba bele fó impaktu ba orsamentu Estadu.
“Ami fó prioridade ba espesialista sira maibé ami koordena ho Ministériu Saúde katak ita presiza haree ba área enfermajen, parteira, analista, no dentaria hodi sira mós bele hasai sira-nia espesialista, lisensiatura ne’e sei jerál hela nune’e presiza hakle’an tan sira-nia estudu,” nia akresenta.
Notísia relevante : FDCH introdús programa bolsa estudu ba estudante sekundáriu sira iha Viqueque
FDCH nia razaun tau importánsia ba espesialista sira tanba bele atende moras iha rai-laran tanba dala barak pasiente haruka hotu bá rai-li’ur tanba laiha espesialista.
FDCH nia proposta orsamentu ba tinan 2025 hamutuk $18.973.544, ne’ebé mak sei finansia ba atividade 51, iha programa prinsipál haat mak hanesan formasaun profisionál ho nia orsamentu $1.223.780 ne’ebé sei finansia atividade tolu, formasaun téknika ho nia orsamentu $2.051.682 sei finansia atividade 16, bolsa estudu ho nia orsamentu $13.956.821 sei finansia ba atividade 30 no funsionamentu no dezenvolvimentu institusionál ho nia orsamentu $1.741.261 sei finansia ba atividade rua.
“Orsamentu tinan oin ami halo transferénsia públika millaun $13 maibé millaun $9 ne’e ami hodi utiliza ba sira-ne’ebé ezistente. Ezistente katak estudante tantu parsiál no pur méritu, inklui iha rai-li’ur no rai-laran,” nia tenik.
FDCH durante ne’e seidauk tau-matan ba ema ho defisiénsia nune’e mak tinan 2025 prevee millaun $4 hodi introdús tan programa foun ba ema na’in-20.
Orsamentu ba FDCH iha tinan 2024 ho montante $16.400.668, ne’ebé daudaun ne’e ninia ezekusaun atinje ona 61%.
“Ami sei ezekuta to’o 90% resin iha fulan ikus tinan ne’e nian,” Diretór otimista.
Jornalista : Osória Marques
Editora : Julia Chatarina
