VIQUEQUE, 25 setembru 2024 (TATOLI)- Fundu Dezenvolvimentu Kapitál Humanu (FDCH, sigla portugés) introdús programa bolsa estudu ba estudante sekundáriu munisípiu Viqueque hodi prepara an atu asesu.
Tuir diretór FDCH, Evaristo Morais Pinto Horacio, esplika, papel FDCH maka prepara bolsa estudu ba estudante Timo-oan sira nune’e instrodús detallu ba estudante sira husi munisípiu Viqueque oinsa maka asesu ba programa bolsa estudu.
“Programa bolsa estudu ne’e, dala ruma ema ladun rona, oportunidade ida-ne’e ami hakarak partilla ba ita-nia estudante sira kona-ba bolsa sira tantu rai li’ur no ba rai laran. Depende ba ita-nia estudante sira asesu, bainhira estudante sira-ne’e finaliza ona sira-nia estudu sekundáriu sira iha ona koñesimentu bolsa estudu”, Evaristo Morais Pinto Horacio, ba Agência Tatoli, hafoin ramata semináriu Feira Karreira ba edukasaun, iha resintu salaun administrasaun, ohin.
Evaristo husu, estudante sekundáriu sira asesu mós stand FDCH ne’ebé iha resintu edifísiu Autoridade munisípiu Viqueque hodi husu direta ba funsionáriu FDCH sira ne’ebé hein.
“Estudante sira labele tauk no moe husu informasaun ba ami-nia tékniku sira, atu sira bele fó informasaun bolsa nian ba ita-nia alin estudante sira. Atu espella mós ba maluk estudante sira seluk ne’ebé la partisipa iha momentu ida-ne’e. Purtantu FDCH iha sidade Dili maibé ita hakarak ne’e fahe ba munisípiu sira atu estudante sira bele hatene”, nia afirma.
Diretór ne’e dezafia estudante sira utiliza telemovél bele asesu ba informasaun pozitvu sira tanba iha mundu teknólojia telemovél ne’e informasaun barak makaĺ iha laran.
“Tan ne’e ba estudante sira-ne’ebé kaer telemovél uza ho di’ak, atu asesu ba bolsa estudu tenke estuda, estuda no estuda tanba bolsa la oferese gratuita ba ema hotu-hotu save mak valór di’ak”, Diretór ne’e enkoraja estudante sira.
Kona-ba programa bolsa estudu ne’ebé FDCH oferese ona ba Timor oan sira hahú tinan 2011-2023 ho programa haat maka hanesan, Formasaun Profisionál, Programa ne’e iha objetivu atu finansia liña Ministeriál sira (LMs) hodi prepara no hasa’e kompeténsia ka skill timoroan sira nian, liuliu joven feto no mane, bázeia ba ezejénsia merkadu traballu.
Maiória orsamentu ba programa SEPFOPE ninian integra hotu iha programa ne’e. Grupu benefisiáriu ba programa ne’e la’ós de’it funsionáriu estadu, maibé publiku timoroan hotu. Dezde 2011 to’o 2023, benefisia ona timoroan hamutuk 40,186, mane 29,489 no Feto 10,697.
Formasaun Téknika, Programa ne’e fó apoiu tomak ba dezenvolvimentu kapasidade funsionáriu Estadu nian ka ajente sira iha estadu tomak ba área oin-oin, haktuir planu no prioridade governu nian ba setór hotu-hotu ho efetivu atu aumenta matenek no dezenvolve nomós mellora di’ak liután prestasaun servisu ajente ka mákina estadu hodi serbi di’ak liután iha sira-nia servisu fatin.
Dezde 2011-2023 benefisia ona timoroan hamutuk 39.552, mane 26.564 no Feto 12.988.
Programa Bolsa Estudu, ne’e ninian foku no objetivu maka atu finansia timoroan feto no mane hodi hetan oportunidade atu kontinua ba estudu nivél ensinu superiór hahú husi nivel Diploma 1 to’o nivel Doutoramentu, ba iha Universidades ka Institutu superiór sira tantu iha rai-laran no rai-li‘ur.
Área estudu sira sei haktuir prioridade governu nesesidade nasaun ninian. Tuir dadús dezde 2011-2023 benefisia ona timoroan 10.975 , bolseiru ativu 5.592, gradua ona 5.113, hetan kanselamentu 263, mate durante estudu 7.
Tuir planu Governu da-sia durante tinan lima sei atribui bolsa estudu ba benefisiáriu hamutuk 5,645 ne’ebé tinan-tinan sei atribui bolsa 1.129.
No Boa Governasaun no jestaun instituisionál, Programa ne’e abranje ba apolu estájiu profesionál, Peskiza ho Fiskalizasaun ne’ebé ho ninia benefisiariu hahú husi 2011-2023 benefisia ona timoroan hamutuk 18,232, mane 10,664 no feto 7,568. Atu asesu ba programa ne’e aprezenta proposta no hetan aprovasaun husi CA-FDCH.
Jornalista : Vitorino Lopes da Costa
Editór : Florencio Miranda Ximenes
