DILI, 04 novembru 2024 (TATOLI) – Diretór Jerál Servisu Rejistu Notariadu Agostinho Gonçalves Viera, hateten Ministériu Justisa preve $500.000 hodi halo tán akizisaun ba pasaporte hamutuk rihun 60-resin no finál dezembru sei to’o Timor-Leste.
“Kona-ba totál estoke Pasaporte, ha’u atu dehan de’it katak sufisiente ba ita para atu ita jere bele to’o iha fulan-Dezembru. Kuandu iha fim dezenbru ita-nia pasaporte rihun 60-resin sei mai tán. Tanba ita preve osan ho montante $500.000 (qinentos mill) atu halo tán akizisaun ba kaderneta pasaporte rihun 60-resin, kontratu ita prepara ona, ita hein de’it halo pagamentu para empreza bele halo ona produsaun ba kaderneta pasaporte”, Agostinho dehan ba jornalista sira iha nia kna’ar fatin Mandarin, Segunda, ohin.
Nia dehan, Governu liuhusi Ministériu Justisa kontinua kontrata Empreza Theles husi França hodi halo akizisaun ba kaderneta pasaporte.
“Ita kontinua kontrata ba Empreza Thales hodi halo produsaun ba ita-nia kaderneta pasaporte”, nia konklui.
Jornalista: Natalino Costa
Editór : Zezito Silva
