DILI, 04 novembru 2024 (TATOLI) – Diretór Jerál Servisu Rejistu Notariadu Agostinho Gonçalves Viera, dehan sistema atendimentu ba pasaporte sei la monu tanba Notariadu iha ona jeradór atu antesipa ahi mate no lakan.
“Ita iha jeradór bo’ot ida no iha semana kotuk bainhira sistema atendimentu Pasaporte monu, ha’u bolu kedan tékniku Notariadu sira hodi husu no bele halo montajen automatika jeradór ba sistema atendimentu Pasaporte para kuandu ahi mate jeradór bele moris automatika hodi ita kontinua halo atendimentu Pasaporte ba públiku no labele afeta ba sistema atendimentu Pasaporte, labele avaria tán hanesan foin daudaun ne’e”, Agostinho Goncalves Viera hateten ba jornalista sira iha nia kna’ar fatin Mandarin segunda ohin.
Viera akresenta katak hafoin instala hotu sistema, kliente ladún dudu malu ona maske loron ida mákina rua bele prodús pasaporte 200 to’o 500.
“Ita bo’ot sira haree ema ladún mai dudu malu iha ne’e, tanba ita laiha ona problema ba produsaun pasaporte. Sé mak kuandu la rejista iha ajendamentu online, bele mai halo tratamentu direta iha ne’e, ami autoriza nia tun ba hasai foto iha kraik”, nia salienta.
Nia rekorda katak iha domingu semana kotuk (20/10), ahi mate, entaun iha loron tuir mai, segunda-feira, afeta ba sistema atendimetu pasaporte no halo sistema la funsiona.
“Sim, los duni katak sistema atendimentu pasaporte monu duni no labele halo atendimentu iha públiku tanba afeta husi eletrisidade mate lakan”, nia konklui.
Jornalista: Natalino Costa
Editór : Zezito Silva
