BAUCAU, 04 novembru 2024 (TATOLI) – Komandu Polísia Nasionál Timor-Leste (PNTL) louva ho maturidade joven relasiona ho kria pás no estabilidade durante selebrasaun loron finadu iha munisípiu Baucau.
Komandante PNTL Munisípiu Baucau, Superintendente Xefe António Maria de Sá, louva maturidade no kooperasaun joven sira tanba parte seguransa la rejista kazu konfrontu ruma entre grupu ka individu durante selebrasaun loron finadu.
“Ita-nia joven sira hatudu ona sira-nia maturidade no koopera tebes ho seguransa, mezmu movimentasaun barak husi Dili mai foho barak, maibé la rezulta konfrontasaun, ita apresia komportamentu jovem sira nian,” Komandante PNTL Munisípiu Baucau hateten iha Vila nova, segunda ne’e.
Seguransa iha loron finadu jeralmente situasaun kontroladu, liuhusi kooperasaun forsa konjunta entre PNTL no FALINTIL-FDTL liuliu ezekuta planu operasaun hanesan halo patrullamentu iha área risku konflitu.
Alende ne’e, parte seguransa deside desloka membru sira iha kada semtériu nune’e garante seguransa ba komunidade sira sunu lilin no kari ai-funan iha rate.
“Ha’u hakarak hateten durente períodu selebrasaun loron boot ne’e laiha konfrontasaun entre grupu ka individu balun,” Superintendente Xefe de Sá akresenta.
Tinan ne’e, selebrasaun loron finadu iha munisípiu Baucau akontese tuda karreta iha área Triloka, postu administrativu Baucau Vila hodi rezulta karreta ida no membru seguransa na’in-rua kanek iha loron-sesta, 31 outubru.
Husi kazu referida parte seguransa konsege halo preparasaun no kaptura suspeitu na’in-lima ne’ebé deskonfia sai autór ba kazu tuda karreta no hakanek membru seguransa.
Notisia relevante: PNTL Baucau garante seguransa durante loron finadu
Jornalista : Natalino Belo
Editór : Evaristo Soares Martins
