DILI, 04 novembru 2024 (TATOLI) – Fundu Nasaun Unidas ba Labarik (UNICEF) fó apoiu ba Ministériu Justisa hodi halo akizisaun ba mákina foun lima ba emisaun Billete Identidade (BI).
“Ita-nia Governu servisu hamutuk ho UNICEF halo akizisaun ba mákina fargo produsaun Billete Identidade foun lima. Agora daudaun husi Ministériu Justisa loke ona tender ba ida-ne’e, la kleur tán, sira sei fo sai rezultadu empreza ida ne’ebé mak sai manán na’in ba ida ne’e, para bele hahú halo ona akizisaun ba mákina Fargo emisaun ba Billete Identidade”, Agostinho Gonçalves Viera hateten ba jornalista sira iha nia kna’ar fatin Mandarin, Segunda, ohin.
Nia dehan, orsamentu ba akizisaun mákina Fargo produsaun BI ne’e mai husi UNICEF.
“Orsamentu ba akizisaun mákina emisaun BI ka Fargo ne’e ita hetan ajuda husi UNICEF. Kada Fargo ne’e nia folin $6000. Ita espera fulan ne’e parte aprovizionamentu Ministériu Justisa bele fó sai ona empreza manán na’in ba ida-ne’e para ita bele funsiona hikas atendimentu BI iha munisípiu sira”, katak.
Rekorda fali katak mákina ba emisaun BI iha munisípiu neen mak avaria ona, hanesan Baucau, Viqueque, Manatatu, Covalima, Bobonaro no Ainaro.
Jornalista: Natalino Costa
Editór : Zezito Silva
