COVALIMA, 05 Novembru 2024 (TATOLI) – Ahi han mutuk uma ida iha aldeia Faularan, suku Maudemo, postu administrativu Tilomar, munisípiu Covalima. Inséndiu ne’e halo vítima Júlio Muti Tilman labele salva nia sasán uma laran, inklui osan $600.
Inséndiu ne’e akontese pur volta tuku 17h00 loraik, iha 04 Novembru, bainhira vítima Júlio Muti Tilman ho nia ferik-oan no oan sira bá tiha to’os mak foin simu informasaun husi viziñu katak ahi han uma.
“Ha’u laiha fatin tanba ha’u ho ha’u-nia feen ho ha’u-nia oan bá to’os. Viziñu hakilar hodi bolu ami ahi han mutuk ona uma, nune’e ami la konsege salva sasán uma laran”, Júlio Muti Tilman konta iha Tilomar, ohin.
Sasán ne’ebé la konsege salva mak hanesan kadeira, meza, sanan, taxu, osan $600 no dokumentu importante sira, maibé viziñu sira konsege hasai de’it mak batar no roupa balun de’it.
Daudaun família seidauk hatene kauza husi inséndiu ne’e no vítima sira hela provizoriamente ho viziñu hodi hein apoiu materiál ba rekuperasaun nian.
Komandante Operasionál Autoridade Protesaun Sivíl (APC, sigla portugés) Covalima, Celestino Ferreira Afonso, realsa katak inséndiu ne’e akonte iha 04 Novembru, maibé vítima sira la konsege kontaktu bombeiru no lidér komunitáriu mak kontaktu xefe departamentu dezastre hafoin informa fali ba APC.
“Ha’u simu informasaun iha tuku 18h00 loraik. Tuir loloos fó kedas apoiu emerjénsia hanesan ai-han no la’ós ai-han ba vítima inséndiu, tanba akontese fora husi oras serbisu, entaun presiza tempu atu halibur malu”, nia relata.
Hafoin simu informasaun, iha loron 05 Novembru, APC hamutuk ho Diresaun Nasionál Risku ba Dezastre Naturál fó apoiu emerjénsia ai-han no la’ós ai-han ba vítima sira iha Tilomar no kontinua rekolla dadus atu fó apoiu materiál ba rekuperasaun nian.
Apoiu emerjénsia ne’ebé APC fó ona mak foos kilógrama 25, mina, supermie no la’ós ai-han mak sasán dapur, biti, lona no seluk tan.
Jornalista: Celestina Teles
Editora: Maria Auxiliadora
