DILI, 05 novembru 2024 (TATOLI) – Komandu Jerál Polísia Nasionál Timor-Leste (PNTL) nomeia no fó pose ba Superintendente Xefe Polísia António de Sá hodi troka Superintendente Xefe Polísia Antoninho Mauluta hodi lidera fali Komandu PNTL Munisípiu Baucau.
Superintendente Xefe Polísia, Antoninho Mauluta mós hetan nomeasaun no simu pose husi Komandu Jerál PNTLhodi lidera fali Unidade Apoia Servisu (UAS) Komandu Jerál PNTL.
Komandante Jerál PNTL, Komisáriu Jerál Henrique da Costa, hateten Komandu halo nomeasaun no pose ba Superintendente Xefe António de Sá hodi lidera fali Komandu PNTL Baucau no rotasaun ka nomeasaun ida-ne’e normalmente akontese iha insititusaun Komandu PNTL tanba nesesidade instituisaun.
“Husu ba ita bo’ot, importante tebes hodi kria koordenasaun no komunikasaun ne’ebé mak di’ak ho Prezidente Autoridade Baucau ho parte igreja, parte veteranus, parte entidade ne’ebé mak iha atu fó susesu ba servisu polísia ninian”, Henrique da Costa, iha nia intervensaun bainhira fó pose ba Superintendente Xefe António de Sá, iha Kuartél Jerál PNTL, Caicoli, ohin.
Tuir nia, atu dirije Baucau mós la fasil presiza ita-nia tempu estra hodi halao servisu iha ne’ebá.
“Baucau mós hanesan hela iha Dili, sempre mosu konflitu iha kualker oras, ataka malu entre grupu iha Baucau mós sempre akontese. Insidente sira ne’ebé envolve GAM no GAR sira iha Baucau nia númeru aas. Tuir relatóriu investigasaun katak munisípiu ne’ebé rejista krime aas ne’e Dili segundu mak Baucau. Tanba ne’e husu para uza ita bo’ot ninia kapasidade hotu uza rekursu ne’ebé PNTL iha Munisípiu Baucau hodi halo medida prevensaun”, nia adianta
Henrique husu ba Komandante PNTL Munisípiu Baucau António de Sá atu buka koordena ho parseiru sira hanesan F-FDTL Komponente Terestre, Unidade Espesiál Polísia halo komunikasaun di’ak ho sira nune’e prevene krime iha zona literorál (hatene) Baucau.
“Munisípiu Baucau iha área tasi ibun ne’ebé barak hanesan iha Laga, Vemase no Watabou husu ba ita bo’ot atu kria koordenasaun ho ita-nia parseiru sira nune’e fó vijilánsia ba fatin sira ne’ebé ita temi ne’e. Tanba fatin sira ne’e ema bele uza sai krime organizadu, bele uza ró ilegál hodi halo peska, halo atividade tráfiku umanu no tráfiku droga. Ita-nia servisu mak nafatin tau atensaun ba fatin sira ne’e hodi halo prevensaun”, nia hateten.
Komisáriu Jerál PNTL mós husu atu Komandante PNTL Baucau halakon ego iha servisu hodi fó susesu ba servisu Komandu PNTL Munisípiu Baucau.
“Halakon ita-nia arogansia servisu ninia. Dalaruma iha buat ruma, ita hanoin ita mesak bele responde buat hotu, labele hanesan ne’e, ita tenke hetan apoiu husi ita-nia kolega sira ne’ebé iha parte sira seluk hodi fo susesu ba servisu komandu ninia”, nia enkoraja.
Komandante Jerál PNTL ne’e mós agradese ba Komandante PNTL Munisípiu Baucau sesante Superintendente Xefe Polísia Antoninho Mauluta ne’ebé entrega ona servisu ba Komandante PNTL Munisípiu Baucau Superintendente Xefe Polísia António de Sá.
“Ha’u hato’o ha’u-nia agradesimentu ba komandante Mauluta ne’ebé mak entrega servisu ba komandante Munisípiu Baucau António De Sá agora. Komandante Mauluta mai fali asume kargu Unidade Apoia Servisu kuartel jerál”, nia konklui.
Komandante foun PNTL Munisípiu Baucau, Superintendente Xefe Polísia António de Sá, hateten kna’ar Komandante PNTL Munisípiu Baucau laos foun ba nia hanesan ofisiál Superiór ne’ebé molok ne’e asume responsablidade Komandante PNTL Baucau sei buka hodi koordena ho entidade sira hodi hamutuk prevene krime iha Munisípiu Baucau.
“Kargu Komandante Munisípiu Baucau ne’e laos but foun ba ha’u tanba ha’u mós asume kargu Komandante Munisípiu Bobonaro no Komandante Munisípiu Baucau depoizde ida-ne’e Komandu dada fali ha’u mai iha ne’e, agora hetan konfiansa ba fila fali lidera Koamandu PNTL Baucau, ha’u sei servisu hamutuk ho entidade sira hotu iha ne’ebá hodi ita prevene krime sira ne’ebé agora akontese iha ne’ebá”, nia afirma.
Nia husu ba joven sira Baucau atu kria dame no pás iha Baucau tanba krime laos ona tempu, agora konsentra ba estuda hodi atinjé mehi ba futuru.
Nune’e mós Komandante UAS Superintendente Xefe Polísia, Antóninho Mauluta hateten, hanesan membru PNTL simu desizaun husi Komandu.
“Hanesan membru PNTL no ofisiál superiór, ita ne’e profisionál kuandu komandu deside koloka ita ba ne’ebé, tenke respeita ba desizaun Komandu”, nia konklui.
Jornalista: Natalino Costa
Editór : Zezito Silva
