DILI, 05 novembru 2024 (TATOLI) – Komandu Polísia Nasionál Timor-Leste (PNTL) liuhusi Departamentu Informasaun Polísia (DIF) Komandu Jerál PNTL asegura joven hamutuk 30 tanba suspeita ba kazu foti subar mótor no hadau telefone iha Dili laran.
Autoridade polísia asegura suspeitu sira ne’e iha área Cristo Rei, Postu Administrativu Cristo Rei Munisipiu Dili, tanba hetan informasaun husi servisu sekretu sira tantu komunidade balun katak suspeitu sira ne’e iha grupu bo’ot ne’ebé mak foti subar ema motór no hadau telefone iha Dili laran.
Ho informasaun hirak ne’e mak ekipa sekretu iha segunda (4/11) kalan Departamentu Informasaun Polísia ba asegura kedan suspeitu sira ne’e iha área Cristo Rei bainhira suspeitu sira ne’e halibur malu iha serimónia festa ne’ebé halao iha área Cristo Rei.
Hafoin Departamentu Informasaun Polísia asegura tiha ema hirak ne’e, lori kedan mai Departamentu Informasaun Polísia nia fatin, Komandu Jerál hodi submete ba indetifikasaun.
Durante prosesu indentifikasaun suspeitu sira deklara iha motorizada hamutuk 40-resin mak sira foti subar (naok) inklui telefone hamutuk lima ne’ebé suspeitu sira durante ne’e hadau husi ema.
Motorizada ne’ebé sira foti subar hamutuk 30 mak sei tau hela iha Dili laran no 10-resin mak faan ona iha Munisípiu Ermera no Suai.
Bazeia ba informasaun husi suspeitu sira, mak Departamentu Informasaun Polísia orienta kedan membru sira ba foti motorizada 30 ne’ebé halo subar Dili, enkuantu motorizada balun ne’ebé lori ona ba Munisípiu Ermera no Suai, membru autoridade sir aba kedan munisípiu hodi lori fila motorizada sira iha Komandu Jerál PNTL, Caicoli.
Vítima Elio Magno, hateten ninia motór lakon iha fulan kotuk, iha uma Fomentu II. Maibé agradese tebes ba Servisu Sekretu husi Polísia Nasionál Timor-Leste tanba konsege hetan fila-fali ninia motór hosi autór ne’ebé mak antes ne’e na’ok.
“Ha’u agradese no orgullu ho ita ninia polísia nia servisu, dala idatán ha’u louva no agradese, nafatin servisu profisionál, tanba ho sira-nia servisu ha’u-nia motór ohin bele hetan fali, polísia tenke servisu hanesan povu ida-ne’e presiza imi”, nia dehan.
Nia konta, motór lakon iha uma, iha fulan-Agostu tinan ne’e iha oras tuku 4:00 madrugada.
“Ha’u-nia motór lakon bainhira para hela iha ha’u-nia uma Fomento II iha agosto fulan kotuk, momentu motór lakon informa kedan ba polísia eskudra Dom Aleixo, maibé graça de Deus ohin hetan fali iha ne’e, suspeitu sira modifika ona ninia mesin”, nia adianta.
Vítima ne’e husu ba Tribunál hodi kondena suspeitu sira tuir lei ne’ebé iha atu suspeitu sira evita na’ok ema nia sasan.
Tuir observasaun TATOLI iha terenu, motór husi vítima Elio Magno nian mak suspeitu sira modifika ona ninia mesin motor hodi tau fali ho mesin tipu seluk no pinta ho kór seluk.
Jornalista: Natalino Costa
Editór : Zezito Silva
