DILI, 08 novembru 2024 (TATOLI) – Komandante Unidade Polísia Marítima (UPM), Superintendente Polísia, Eugénio Pereira, dehan Komandu PNTL hahú halo manutensaun ba ró Unidade Polísia Marítima ho naran BP.601 Lusitania.
Nia dehan, ró Lusitania ne’e kuaze tinan 11 Komandu PNTL la halo manutensaun, tanba ne’e, tinan ida-ne’e Komandante Jerál PNTL Komisáriu Jerál Henrique da Costa hatún desizaun hodi halo manutensaun ba ró UPM.
“Ita presiza halo manutensaun ró UMP nian ne’e tanba ne’e ohin empreza ne’ebé sai manán nain ba manutensaun ró UPM hamutuk ho ekipa téknika UPM hahú halo manutensaun ba ró UPM. Molok atu halo manutensaun ba ró ne’e ita tenke lori mai iha rai maran”, Eugénio Pereira hateten ba jornalista sira iha kuartel UPM Seonal Dili, sesta, ne’e.
Nia dehan, Komandu PNTL preve $250.000 atu halo manutensaun ba ró Polísia Marítima no orsamentu ne’e mai husi Orsamentu Jerál Estadu 2024.
“Manutensaun ne’ebé ita halo mak iha parte mákina ró nian parte Navegasaun no hadia eletrisidade sira iha ró Lusitania nia laran, buat tolu ne’e mak ita sei halo manutensaun”, nia adianta.
Komandante UPM ne’e dehan, Komandu PNTL kontratata Empreza Bibora Atauro Express mak halo manutensaun ba ró Unidade Polísia tanba empreza ne’e mak priénse rekezitu aprovizionamentu Komandu Jerál PNTL.
“Ita hatene katak ró UPM Lusitania ne’e tinan 11 lahalo manutensaun, maibé ita hetan ona empreza no ohin empreza hahú halo manutensaun, kuandu empreza la konklui tuir kontratu ne’ebé mak ita aplika mak sei tuir lei aprovizionamentu”, nia afirma.
Komandante UPM ne’e fundamenta, UPM planeia atu halo manutensaun ba ró Inviud no ró Kay Rala hodi bele halo operasionalizasaun. Maibé ba kestaun ne’e husi ekipa téknika UPM halo hela levantamentu ba ró rua referida.
“Kuandu ró sira ne’e mak ita halo hotu manutensaun hotu, ami fiar ita bele halo vijilánsia ba ita-nian tasi ho di’ak liután”, nia dehan.
Iha fatin hanesan, reprezentante Empreza Atauro Express, Luis Alves, garante empreza sei konklui manutensaun ró UPM tuir kontratu ne’ebé selebra ho Komandu PNTL.
“Ami kompañia hetan kontratu husi Komandu Jerál PNTL ba manutensaun Ró Unidade Polísia Marítima. Tuir kontratu ne’ebé mak iha manutensaun ne’e durante fulan hitu, maibé garante katak ida-ne’e ami bele konklui antes fulan hitu”, nia dehan.
Reprezentante empreza Atauro Express ne’e hateten, buat ida manutensaun ne’e laos buat fasil, maibé hanesan empreza ne’ebé Komandu PNTL fó fiar ba manutensaun ró UPM sei haree didiak buat hotu los ona mak foin hatama ró ne’e ba tasi laran nune’e bele halo operasaun.
Jornalista: Natalino Costa
Editór : Zezito Silva
