DILI, 08 novembru 2024 (TATOLI) – Komandante Departamentu Investigasaun Kriminál (DIK) Nasionál, Superintendente Xefe João Belo, husu ba inan-aman atu kontrola oan sira-nia movimentu iha tempu kalan no prevene ransu arbiru atu labele monu ba tentasaun oioin.
“Nasaun ida atu seguru, ema hotu nia kontribuisaun, laos polísia mesak, laos Governu nia servisu mesak, mas ema hotu nia kontribuisaun, Individu ida, inan-aman sira tenke hanorin oan sira oinsá mak labele sai kriminozu, inan-aman sira tenke kontrola oan sira halo saida. Inan aman sira kuandu oan uza motór tenke buka tuir motor, ne’e sé mak hola, inan aman mak hola ka motór ne’e naok, ne’e inan-aman nia responsablidade”, Superintendente Xefe João Belo hateten ba jornalista sira iha nia kna’ar fatin Komandu Jerál PNTL Caicoli, sesta, ohin.
“Ba labarik sira minoridade mos nune’e, tanba sira kuandu halo sala mak PNTL identifika ne’e mós sei bolu sira-nia inan no aman hodi mai husu sira-nia responsablidade tanba saida maka buat ne’e akontese iha ita bo’ot sira-nia família laran”, nia adianta.
Nia dehan, krime burla ne’ebé akontese iha Dili laran envolve labarik sira ho idade minoridade.
“Husu ba inan aman atu kontrola oan sira, favor, liu liu sira-nia movimentu atu labark sira-nia futuru di’ak mak inan aman tenke iha responsablidade másimu”, nia konklui.
Jornalista: Natalino Costa
Editór : Zezito Silva
