DILI, 08 novembru 2024 (TATOLI) – Prezidente Repúblika, José Ramos-Horta, parabeniza Prezidente eleitu Estadu Unidu Amérika, Donald John Trump, ne’ebé hetan fila-fali konfiansa husi povu Amerikanu hodi lidera hikas territoriu Amérika ba periodu ida.
“Ha’u kontente atu hato’o ha’u nia parabéns espesial liu ba ita-boot nia eleisaun nu’udar Prezidente ba dala 47 Estadus Unidus Amérika nian,” Ramos-Horta hakerek iha nia pajina ofisiál facebook ne’ebé Agência TATOLI asesu, ohin.
Xefe Estadu dehan tan, “Povu Estadu Unidu Amérika nian tau sira nia konfiansa maka’as iha ita-boot nia lideransa. Tempu dezafiante no perigozu sira-ne’e husu lideransa ne’ebé bele taka divizaun no hari’i parseria ba dame. Ita-boot nia exelénsia bele tama iha istória nu’udar ema ne’ebé halo dame globál, ne’ebé presiza tebes iha mundu ohin loron nian”.
“Ha’u nia konviksaun katak ita-boot nia lideransa sei hadi’a fali relasaun sira ho Rúsia no Repúblika Populár Xina nian ba pás no parseria ne’ebé dura. Nune’e mós, mundu hein hela Ita-boot nia lideransa hodi lori dame no estabilidade ne’ebé dura ba tempu naruk ba Líbanu, Ukránia no Gaza, no realizasaun ba rai-inan Palestina nian ne’ebé moris hamutuk ho Israel ne’ebé seguru,” Horta hateten.
PR Horta hatutan, Jeografia haketak maibé Timor-Leste no Estadu Unidu Amérika fahe valór fundamentál demokrasia, estadu direitu no respeitu ba dignidade umana.
“Ha’u fiar katak iha ita-boot nia Administrasaun nia okos ita sei hametin liután ita-nia lasu no kooperasaun bilaterál. Ha’u dezeja ba Ita-boot nia Exelénsia no família estimadu ksolok no susesu barak iha Ita-boot nia esforsu hotu-hotu,” Horta hakotu.
Eleisaun ba Prezidente EUA
Donald Trump manán Kamala Harris husi Partidu Demokrátiku iha konkursu eleitorál EUA 2024, nia sei sai nu’udar Prezidente EUA ba dala-rua.
Trump, ne’ebé sai nu’udar Prezidente norte-amerikanu iha períodu 2017-2021, forma ona polítika no sosiedade norte-amerikanu liuhusi regulamentu polémiku sira reforma fiskál nian, polítika sira imigrasaun nian no nomeasaun husi juis sira Supremu Tribunál nian, to’o eskándalu oioin.
Biografia badak Donald Trump
Naran kompletu Donald John Trump maka polítiku, emprezáriu no figura mídia Amerikanu ida ne’ebé moris iha loron 14 fulan-juñu tinan 1946 iha Queens, Nova Iorke.
Nia sai famozu hafoin sai nu’udar Prezidente Estadu Unidu nian ba dala 45 hahú hosi loron 20 fulan-Janeiru tinan 2017 to’o loron 20 fulan-Janeiru tinan 2021.
Trump hanesan oan dahaat hosi oan na’in lima ne’ebé moris hosi Fred ho Mary Trump. Nia aman maka dezenvolvedor imobiliáriu ida ne’ebé susesu. Nia tuir Akademia Militár Nova Iorke no depois kompleta nia edukasaun iha Eskola Finansa no Komérsiu Wharton iha Universidade Pennsylvania, gradua ho lisensiatura iha ekonomia iha tinan 1968.
Tempu Polítiku no Administrasaun Trump
Trump nia aspirasaun polítika sira hahú mosu iha dékada 1980 nia rohan. Hafoin tentativa oioin ne’ebé la hetan susesu, nia ofisialmente anunsia nia kandidatura ba prezidente iha loron 16 fulan-Juñu tinan 2015. Konkorre nu’udar republikanu, nia manán nomeasaun iha fulan-Jullu tinan 2016 hafoin halakon kandidatu barak iha primária sira.
Iha vitória surpreza ida hasoru Demokrata Hillary Clinton iha loron 8 fulan-Novembru tinan 2016, Trump eleitu nu’udar Prezidente. Ninia administrasaun foka ba asuntu xave oioin inklui reforma fiskál, polítika imigrasaun, no relasaun esterna. Espesifikamente, nia implementa hamenus impostu ne’ebé signifikativu no negosia fali akordu komersiál sira hanesan NAFTA iha USMCA.
Nia maka Prezidente Estadus Unidus nian dahuluk ne’ebé laiha esperiénsia anteriór iha kargu eletivu ka militár. Nia halakon presedente iha dalan barak, hanesan derepente halo anúnsiu boot ida iha Twitter, plataforma mídia sosiál ne’ebé agora opera hosi empreza Musk nian no hanaran fali X.
Trump nia mandatu dahuluk iha White House hosi 2017 to’o 2021 marka ho rotasaun aas ida ne’ebé ladún baibain hosi ofisiál superiór sira, ho barak maka hetan demisaun ka rezigna-an tanba diferensa sira ho nia no konflitu sira iha nia ekipa.
Hanesan akontese ona dezde loron dahuluk sira hosi nia kampaña, Trump nia retórika ne’ebé dalabarak hirus no odiu hamosu polémika enkuantu aumenta nia popularidade.
Relasaun Estranjeiru sira husi karakteristika Trump nian
Haree ba nia aprosimasaun ba asuntu estranjeiru sira, nia estilu maka tranzasionál tebes. Nia hatudu ona konfiansa iha nia abilidade hodi tesi akordu sira ho líder estranjeiru sira hanesan Prezidente rusu Vladimir Putin, Prezidente Xinés Xi Jinping no líder norte-koreanu Kim Jong Un.
Durante nia mandatu, Trump envolve iha diplomasia nivel aas ne’ebé laiha presedente ho Kim, hala’o enkontru oin-ba-oin tolu iha esforsu ida hodi konvense Koreia-Norte atu abandona nia esforsu sira hodi dezenvolve arma nukleár sira.
Entre líder mundiál sira, nia iha relasaun di’ak liu ho Primeiru-Ministru Japaun nian ne’ebé mate ona, Shinzo Abe, ne’ebé hamutuk ho nia ba golpe iha okaziaun oioin. Hafoin manan iha eleisaun prezidensiál 2016, Prezidente eleitu iha tempu ne’ebá, Trump, hili Abe, ne’ebé promete ona atu “restaura Japaun ida ne’ebé forte”, ba enkontru dahuluk ho líder estranjeiru ida.
Jornnalista: Hortencio Sanchez
Editor: Florencio Miranda Ximenes
