DILI, 11 novembru 2024 (TATOLI) – Ministru Interiór Francisco Guterres, hateten Governu presiza diploma ministeriál ida molok halo rekrutamentu ba membru Polísia Nasionál Timor-Leste (PNTL) foun iha tinan oin.
Nia dehan, Ministériu Interiór prepara hela diploma lejislativa ida, kuandu konklui ona diploma ne’e sei lori ba Konsellu Ministru hodi halo aprovasaun no sei públika iha Jornál Repúblika hafoin anunsia ba públiku kona-ba rekrutamentu ba membru PNTL foun.
“Prosesu ne’e lao hela, ita halo hela preparativu, falta uitoan de’it tanba prosesu hotu lao tiha ona, falta dokumentu legál de’it ona para bele realiza asuntu sira ne’e. Kuandu ita konklui prosesu ne’e ita sei lori ba Konsellu Ministru atu aprova depoizde aprovasaun husi Konsellu Ministru, ita sei públika iha Jornál Repúblika ho nune’e ita foin anunsia ba públika kona-ba rekrutamentu membru PNTL foun”, Francisco Guterres hateten ba jornalista sira iha Parlamentu Nasionál, Segunda, ohin.
Governante ne’e dehan, rekrutamentu ba membru PNTL foun ne’e sei halo iha tinan oin, tanba Governu prepara hela diploma ministeriál.
“Rekrutamentu ba membru PNTL foun sei halo tinan oin. Tanba ita presiza diploma lubun bo’ot ida. Ha’u espera fulan ida-ne’e no fulan oin ita konklui, tanba ita hatene katak agora ita iha hela faze diskusaun orsamentu. Maibé ita tenke anunsia rekrutamentu ba membru PNTL foun”, nia adianta.
Nia dehan, diploma ministeriál ne’e sei deskreve kritériu rekrutamentu membru PNTL foun.
“Ha’u labele koalia lai kona-ba nia kritériu ba rekrutamentu ne’e maibé di’ak liu, imi hein ami sei halo anunsiu públiku. Ami sei fó dokumentu ba imi hotu para imi bele públika kona-ba dokumentu sira ne’e”, nia konklui.
Jornalista: Natalino Costa
Editór : Zezito Silva
