DILI, 14 novembru 2024 (TATOLI) – Tribunál Judisiál Primeira Instánsia Dili (TJPID), kinta ne’e, halo julgamentu ba kazu danu simples ne’ebé envolve husi arguidu na’in-tolu.
Arguidu na’in tolu ne’e mak Octavio de Araujo, Deonisio Pinto no Deonisio Lina, arguidu refere ho kondisaun lanu hodi tuda estrada lezada Joana da Silva nia uma ho hahalok arguidu sira ne’e, Ministeriu Públika akuza ho krime danu simples ne’ebé previstu iha artigu 259 husi Kódigu Penál Timor-Leste.
Iha sala julgamentu, lezada Joana deklara perdua arguidu sira-nia hahalok no prontu dame ho arguidu sira ba sala ne’ebé sira halo ona.
“Momentu ne’e ha’u hakarak problema ida-ne’e ami deside atu rezolve de’it tuir família hodi labele lori mai Tribunál, maibé sira mak lakohi hakbesik mai ami atu rezolve”, lezada Joana da Silva salienta iha sala julgamentu Tribunál Judisiál Primeira Instánsia Dili, kinta ,ohin.
Nia haktuir, arguidu sira mós deklara ba Tribunál katak sira prontu husu deskulpa ba lezada Joana ba sala ne’ebé sira halo ona no sei la repete tán hahalok ida-ne’e.
“Ami aseita hodi dame ho lezada Joana ba sala ne’ebé sira halo ona”, Octavio konfesa.
Haree ba kestaun, Ministériu Públiku laiha obzesaun ruma tanba lezada perdua ona arguidu sira tanba ne’e husu Tribunál hodi hatún no foti desizaun tuir Tribunál nia entendimentu.
Hafoin rona tiha parte hirak ne’e, Juiz prosesu Ivan Suritai hateten krime danu ne’e nudar krime semi-públiku tanba lei fó fatin atu lezadu no arguidu sira bele hadame malu iha Tribunál atu nune’e Tribunál labele insiste tan ba julgamentu.
”Tuir lei kuandu lezadu perdua ona arguidu sira entaun Tribunál mós tenke husu ba arguidu sira no ohin sira deklara katak hadame malu ona tanba Tribunál deside absolve arguidu sira husi krime ne’ebé Ministériu Públiku imputa ba imi tanba imi deside dame malu ona iha Tribunál nia oin katak sei rezolve problema ne’e liuhusi dalan família”, nia konklui.
Jornalista: Natalino Costa
Editór : Zezito Silva
