DILI, 18 novembru 2024 (TATOLI) – Prevedoria Direitus Humanus no Justisa (PDHJ) Timor-Leste sai uma-nain ba konferénsia anuál Southeast Asia National Human Rights Institution Forum (SEANF) ba dala-21 ne’ebé hala’o iha Dili durante loron tolu, hahú iha 18 to’o 20 fulan-Novembru 2024.
Membru Southeast Asia National Human Rights Institution Forum kompostu husi Komisaun Nasionál Direitus Humanus no Justisa Malázia, Filipina, Myanmar, Thalandia, Komisi Nasionál Hak Asasi Manusia (Komnas Ham), Indonézia no PDHJ Timor-Leste .
Prevedór Direitus Humanus no Justisa Virgílio Guterres, dehan tinan ne’e sai uma-nain ba konferénsia Southeast Asia National Human Rights Institution Forum (SEANF) ba dala-21 ne’ebé halo iha Dili.
“Eventu ohin ne’e enkontru anuál kona-ba komisaun direitus humanus Sudeste Aziátiku ninia ne’ebé ema bolu SEANF, PDHJ mak lidera tinan ne’e”, Virgílio Guterres hateten ba jornalista sira hafoin abertura konferénsia Southeast Asia National Human Rights Institution Forum iha Hotel Novo Turismo, segunda ohin.
Nia dehan, iha abertura SEANF koalia kona-ba asuntu oioin tráfiku umanu iha fronteira no asuntu ida tan tortura iha sela detensaun ne’ebé ke Talandia mak aprezenta no iha konferénsia ne’e Filipina mak propoin hela mekanizmu investigasaun kuandu akontese violasaun direitus umanus iha ASEAN ne’ebé envolve husi lider sira iha ASEAN.
”Oin ne’e ami aprezenta asuntu barak, traÁfiku umanu iha fronteira no asuntu ida tan, tortura iha sela detensaun ne’ebé ke Talandia mak aprezenta no iha konferénsia ne’e Filipina mak propoin hela mekanizmu investigasaun kuandu akontese violasaun direitus umanus iha ASEAN ne’ebé envolve husi lider sira iha ASEAN no ami mós partilla hamutuk situasaun kona-ba situasaun direitus umanus iha nasaun ASEAN agora no dezafiu sira mai ne’e “, nia afirma.
Nia dehan, konferénsia anuál Southeast Asia National Human Rights Institution Forum (SEANF) ba dala-21 ne’ebé halao iha Dili sei hala’o loron tolu no nasaun membru SEANF deside sei entrega prezidénsia SEANF ba Indonézia atu lidera fali tinan oin.
Iha fatin hanesan, ketua Komisi Nasionál Hak Asasi Manusia Indonézia, Atnike Nova Sigiro, hateten, Konferénsia Komisaun Nasionál Direitus Umanus ASEAN ba tinan ne’e koalia kona-ba asuntu direitus umanus iha nasaun ASEAN, reforsa kooperasaun institusionál sira ne’ebé nasaun membru SEANF estabelese ona hodi fó asisténsia direitus umanus ba komunidade sira iha nasaun ASEAN nian.
“Ohin ami koalia kona-ba hametin no haforsa kooperasaun insitusionál sira ne’ebé nasaun membru SEANF halo durante ne’e iha ona hodi fó asisténsia direitus umanus sidadaun sira”, nia dehan.
Nia hatutan, iha biban ne’e diskute kona-ba kestaun torturasaun ba ema idozu sira. Iha oportunidade ne’e ami mós partilla esperiénsia kona-ba asuntu direitus umanus nasaun membru SEANF.
Jornalista: Natalino Costa
Editór : Zezito Silva
