DILI, 18 novembru 2024 (TATOLI)–Diretór Jerál Dezenvolvimentu Lokál iha Ministériu Administrasaun Estatál, Vírgilio da Costa, hateten, projetu Planeamentu Dezenvolvimentu Integradu Munisipál (PDIM) relata progresu projetu PDIM 2024 iha munisipiu sira-ne’e ninia progresu implementaun ne’ebé atinje ona 54%.
Nia hateten, persentajen ne’e husi totál projetu PDIM iha 2024 nian hamutuk 117 iha munisipiu hotu-hotu ne’e husi janeiru to’o outubru, no mak projetu PDIM ne’ebé la’o hela iha munisipiu mak Aileu haat (4), Ainaro ida (1), Ataúro lima (5), Baucau 10, Bobonaru 16, Covalima ualu (8)8, Dili 17, Ermera sia (9), Lautémn 16, Liquiça 10, Manatuto sia (9), Manufahi ualu (8) no Viqueque haat (4).
“Tuir ami-nia dadus supervizaun, projetu ne’ebé la’o hela iha 2024, ita iha projetu hamutuk 117 no atinje ona 54%,” Diretór Jerál Dezenvolvimentu Lokál iha Ministériu Administrasaun Estatál, Vírgilio da Costa, hateten ba Agência TATOLI, iha Vila Verde.
Projetu PDIM ne’e, nia dehan, implementa iha área sira hanesan infraestrutura fízika ba edifísiu ba tratamentu saúde, edukasaun, estrada no irrigasaun.
Projetu PDIM iha 2021 hamutuk 52, iha 2022 hamutuk 16 no iha 2023 hamutuk 54 ne’ebé kuaze atinje 100%.
Total orsamentu ba projetu PDIM nian hosi 2021 to’o mai 2024 nian ne’e, Governu aloka montante hamutuk $28.034.138,50.
Diretór ne’e haheten, Governu selu hotu ona projetu sira-ne’ebé atinje progresu iha persentajen ho totál orsamentu hamutuk $15.768.968,83
Tuir nia, orsamentu ne’ebé aloka ba iha kada projetu PDIM ne’e inferiór rihun $500.
Jornlista : Jesuína Xavier
Editór : Cancio Ximenes
