DILI, 19 novembru 2024 (TATOLI) – Defeza husi Costancio Pinto, Advogadu Privadu Timotio de Deus, hateten Tribunál Rekursu hatún ona akordaun hodi husu ba Tribunál Judisiál Primeira Instánsia Dili atu halo rejulgamentu ba kazu partisipasaun ekonomia iha negósiu ne’ebé envolve husi antigu Ministru Komérsiu Indústria no Ambiente (MCIA) Constancio Pinto no arguidu rua seluk tanba desizaun ne’ebé Tribunál Judisiál Primeira Instánsia foti ne’e fatus balun hamosu dúvida.
¨Prosesu ho NUC 0050/18 PGCC ba kazu partisipasaun ekonomia iha negósiu ne’ebé envolve husi ha’u-nia kliente Costancio Pinto hanesan defeza ha’u halo rekursu kontra desizaun Tribunál Primeira Instánsia Dili ninia. Ha’u-nia rekursu ne’e Tribunál Rekursu hasai ona ninia akordaun iha 20 juñu 2024 hodi anula desizaun husi Tribunál Judisiál Primeira Instánsia Dili nian ne’ebé kondena pena tinan neen ba ha’u-nia kliente Costancio Pinto. Iha desizaun ida-ne’e Tribunál Rekursu haree katak julgamentu ne’ebé Tribunál Judisiál Primeira Instánsia Dili halo ne’e seidauk sufisiente tanba iha faktu lubuk ida mak Tribunál seidauk halo julgamentu ho di’ak hodi deside katak fatu sira ne’e provadu ka la provadu¨, Timotio de Deus hateten jornalista sira iha Tribunál Dili tersa, ohin.
Nia dehan, desizaun Tribunál Rekursu husu ba Tribunál Primeira Instánsia Dili atu halo rejulgamentu ba kazu Costancio Pinto inklui arguidu rua seluk hodi halo fali apresiasaun ba desizaun Tribunál Primeira Instánsia inklui fatu sira ne’ebé aprezenta husi Ministériu Públiku no parte defeza sira nian.
Tanba fatu sira ne’ebé aprezenta husi defeza, arguidu sira-nian ba Tribunál Judisiál Primeiru Instánsia Dili Tribunál la konsidera.
¨Desizaun ne’ebé Tribunál Rekursu husu atu Tribunál Primeira Instánsia tenke halo julgamentu foun hodi halo apresiasaun ba faktu sira ne’ebé husi MinisteÉriu Públiku akuza ba arguidu sira, fatu sira ne’e provadu ka la provadu¨, nia adianta.
Advoadu Privadu ne’e hateten, rekursu ne’ebé aprezenta ba Tribunál Rekursu hodi kontesta Tribunál Koletivu ka Tribunál Judisiál Primeiru Instánsia Dili nian desizaun ba pena ne’ebé aplika ba nia kliente Costancio Pinto inklui krime ne’ebé Ministériu Públiku imputa ba nia kliente.
¨Ha’u rekore ba Tribunál Rekursu hodi kontesta desizaun Tribunál nian no krime ne’ebé Ministériu Públiku imputa ba ha’u-nia kliente. Ha’u husu Tribunál koletiva tenke haree fila fali desizaun ne’e tanba ami-nia kliente inosente, tanba ne’e Tribunál Rekursu aseita ha’u nia rekursu hodi anula desizaun Tribunál Primeira Instánsia hodi deside rejulgamentu fila fali kazu ne’e¨, nia afirma.
Rekorda fali katak molok ne’e arguidu Costancio Pinto no Antonio da Costa Ministériu Públiku akuza ho krime partisipasaun ekonomia iha negósiu no nain ba Empreza Stard Product Uni Pessoal Lda Ministériu Públiku Jose Deolino Ximenes akuza ho krime administrasaun danoza ba projetu resiklakjen iha 2016 ne’ebé halo husi Product Uni Pessoal Lda iha Dili Manleuna no Hera .
Tribunál Judisiál Primeira Instánsia Dili kondena arguidu Costancio Pinto ho pena prizaun efetivu tinan lima, arguidu Antonio da Costa ho pena prizaun tinan lima no nain ba Empreza Stard Product Uni Pessoal Lda Ministériu Públiku Jose Deolino Ximenes ba tinan haat fulan 10 no Tribunál husu Deolino devolve fila fali osan ne’ebé nia simu hodi halo atividade resiklajen.
Jornalista: Natalino Costa
