Ermera, 20 novembru 2024 (TATOLI) – Eskola Ensinu Báziku Filial Nú 238 Tata-Mailau-Leo-Basa, ne’ebé lokaliza iha Suku Lauana, Postu Administrativu Letefoho, Munisípiu Ermera laiha bee-moos, entaun kada loron sábadu, manorin sira obriga estudante idaidak tenke kuru bee litru lima hodi lori ba eskola.
Estudante Ester Deus hanesan ema ho defisiénsia matan, informa kada loron sábadu, profesór sira obriga sira tenke ba kuru bee ho distánsia liu kilómetru ida hodi lori mai eskola.
“Ami iha loron sábado, ami tenke ba kuru bee, tanba ida-ne’e profesór mak haruka ne’e obrigatóriu, depois distánsia husi eskola ba bee-matan kilómetru ida-liu, entaun hanesan estudante atu hetan matenek presiza kontribui, nune’e bele uza ba nesesidade eskola nian”, Ester Deus informa, ba jornalista sira iha eskola Filial Tata-Mailau-Leo-Basa, iha Aldeia Leobasa, Suku Lauana, ohin.
Nia dehan, aleinde estudante sira, profesór sira mós tenke lori hotu bee kada ema ida tenke lori masa ida atu bele uza ba merenda eskolár ho haris fatin.
“La’ós ami de’it mak lori bee, maibé manorin sira mós lori no estudante sira kada ema na’in ida masa ida, atu nune’e bele utiliza ba hodi tein merenda eskolár no tau ba haris fatin”, nia esplika.
Hatan ba preokupasaun ne’e, Koordenadór Ensinu Báziku Nú 238 Filial Tata-Mailau-Leo-Basa Domingos Soares, rekoñese katak regra ne’ebé implementa iha eskola ne’e, kada loron sábadu estudante sira tenke lalin bee-moos tanba iha ne’e ema hotu enfrenta problema bee moos, entaun ho ida-ne’e mak eskola kria inisiativa katak iha sábadu, estudante obrigatóriu tenke kuru bee-moos hodi uza ba tein merenda eskolár no ense iha haris fatin.
“Bee ne’e ense ba haris fatin no uza ba tein merenda eskolár, durante semana ida nia laran to’o sábado mak kuru fali nune’e bele uza ba merenda ninian no ba haris fatin, se estudante sira mak la kuru no haris fatin ne’e fo’er mak obrigatóriu haruka labarik sira tenke kuru bee kada sábadu”, Domingos esplika.
Nia haktuir, kada labarik ida masa litru lima atu bele uza tanba iha ne’e difikuldade ne’ebé mak eskola enfrenta mak bee-moos.
“Distánsia husi bee-matan, mai eskola dook, tanba bee-moos iha fali kraik, depois eskola lokaliza fali leten, tanba ne’e bee ne’e la sa’e, karik sira la ba kuru ita bolu komunidade sira lori bee moos mai, ne’e ita tenke selu fali tanba ida-ne’e mak ami kria regras ida-ne’e atu bele uza ba semana ida”, nia informa.
Nia subliña, nu’udar manorin, tuir lolos ida-ne’e kontra regras, maibé ida-ne’e mak situasaun ne’ebé mak akontese iha ne’e.
“Tuir loloos ami labele obriga labarik sira ne’e, ida-ne’e ami kontra regras maibé ida-ne’e obrigatóriu, se eskola iha haris fatin bee laiha, ne’e problema boot, karik loroloron mak nia simu ai-han husi merenda eskolár depois nia atu soe bee boot ne’e nia atu ba ne’ebé, entaun ida-ne’e maneira ne’ebé mak ami uza atu hodi halo, maibé la’ós ba labarik hotu, lae, sira ne’ebé mak kiik ami dehan labele”, nia hateten.
Xefe Aldeia Leobasa Alfredo Maia Pires, rekoñese problema bee-moos ne’ebé mak eskola ka aldeia Leobasa hasoru, entaun eskola ho komunidade kria inisiativa ida-ne’e hodi bele uza ba nesesidade no mós tau ba haris fatin.
“Hanesan Autoridade sente triste tanba bee laiha, tuir lei dehan katak estudante sira labele lori bee no labele obriga, entaun bee susar entaun ida-ne’e obrigatóriu tanba sira mós iha sentina ka uza ba tein merenda eskolár, ne’ebé mestre mós lori hotu, tanba ida-ne’e hetan konkordánsia husi parte inan-aman no autoridade lokál ho parte eskola nian”, Alfredo Maia Pires akresenta.
Ensinu Báziku Filial númeru 238, Lokaliza iha Aldeia Leobasa, Suku Lauana, Postu Administrativu Letefoho, Munisípiu Ermera ho totál manorin hamutuk hitu no totál estudante hamutuk 189.
Jornalista : Felicidade Ximenes
Editór : Zezito Silva
