CAC submete ona relatóriu korrupasaun Timor-Leste ba UNCAC

DILI, 20 novembru 2024 (TATOLI) – Komisáriu Komisaun Anti-Korrupsaun (CAC, sigla portugés), Rui Pereira dos Santos, dehan CAC submete ona relatóriu ba medida prevensaun korrupasaun ne’ebé Governu Timor-Leste halo ba Oranizasaun Nasaun Unidas ba asuntu kontra korrupasaun ka United Nations Convention against Corruption (UNCAC).
Santos dehan, Estadu parte husi UNCAC tanba ne’e, Timor-Leste iha obrigasaun tenke hato’o nia relatóriu kona-ba medida Governu Timor-Leste ba prevensaun anti-korrupasaun to’o ona iha ne’ebé atu UNCAC bele hatene.
¨CAC haruka ona relatóriu servisu Estadu Timor-Leste nian ba prevensaun kombate korrupasaun, ita-nia relatóriu ba ona no tinan oin nasaun rua hanesan Marshall Island no Bulgaria sei mai halo avaliasaun ba ita-nia relatóriu ida-ne’e¨, Rui Pereira dos Santos hateten ba jornalista sira hafoin atualiza servisu UNCAC ba funsionáriu CAC no instituisaun relavante sira ne’ebé hala’o iha salaun diplomátika Ministériu Negósiu Estrajeiru no Kooperasaun (MNEK), kuarta ne’e.
Tanba ne’e, CAC realiza enkontru importante ho institusaun relevante, hanesan Ministériu Públiku, Tribunál , MNEK, Inspesaun Jerál Estadu, Sosiedade Sivil, atu atualiza kestaun hirak ne’e ba instituisaun sira ne’e atu ekipa husi nasaun rua ne’e mai iha tinan oin, institusaun sira bele ajuda atu halo avalisaun.
Nia esplika, Governu durante ne’e halo prevensaun korrupasaun iha Timor-Leste marka pasu pozitivu.
¨Prevensaun Korrupasaun iha Timor-Leste iha pozitivu tanba ha’u hanoin ita iha ona lei Medida Prevensaun Kombate Korrupasaun tanba iha artigu balun ne’e ajuda ona husu kargu xefia sira tenke deklara sira-nia riku-soin. Ida-ne’e sentidu saida, se karik kargu xefia sira ne’e balun envolve iha atu korrupsaun, ne’e fasil ba ami bele halo pedidu ba Tribunál hodi fó autorizasaun para ami tama iha sistema hodi check ema ne’e nia aset sira tanba sa mak nia riku derepente¨, nia adianta.
Nia dehan, la’os ba kargu xefia de’it maibé ba ema hirak ne’ebé asume kargu hanesan Komisáriu CAC, deputadu, ministru inklui titulár orgaun soberanu sira kuandu komete hahalok korrupasaun ne’e tuir lei MPCC A Lei N.º 7/2020, 26, agusto Tribunal Rekursu liuusi Kámara Kontas mak sei halo prosesu ba ida-nee.
Iha fatin hanesan, Vise Ministru Fortalesimentu Institusional, Paulo Manuel dos Remédios, akresenta Governu komprometidu kontinua apoia servisu CAC inklui instituisaun sira seluk atu prevene korrupasaun.
¨Ita sei halo lei sira ne’ebé ladauk iha atu fortalese servisu ba kombate korrupasaun nia¨, nia afirma.
Governante ne’e dehan, presiza reforsa servisu CAC nian tanba Timor-Leste hanesan Estadu membru UNCAC atu ba oin bele kombate korrupasaun ho di’ak liután.
Kona-ba tipu kazu korrupsaun ho totál kazu sira, Komisáriu afirma katak asuntu sira sai segredu justisa no labele fó sai ba públiku.
Jornalista: Natalino Costa
Editór : Zezito Silva

