DILI, 20 novembru 2024 (TATOLI) — Primeiru-Ministru, Kay Rala Xanana Gusmão, agradese ba kontribuisaun husi deputadu hotu-hotu ne’ebé mai husi bankada hotu-hotu iha Uma Fukun Parlamentu Nasionál ne’ebé fó kontribuisaun maka’as durante debate Orsamentu Jerál Estadu 2025 la’o ho di’ak no pasa iha finál globál.
“Ha’u agradese ba Parlamentu Nasionál ne’ebé aprova ona orsamentu ida ne’e no-mós renovasaun votu konfiansa ba Governu. Ha’u nia agradese ba kontributu hosi deputadu sira hotu hosi bankada Parlamentares hotu,” Xanana tenik iha nia mensajen ikus ba debate OJE 2025 iha Parlamentu Nasionál, kuarta ne’e.
Notisia relevante:PN aprova proposta OJE 2025 biliaun $2,6 iha finál globál ho votu afavór 42
Xefe Governu konsidera debate ida-ne’e hatudu debate ida ne’ebé partisipativu hosi deputadu hotu-hotu ho kontribuisaun, sujestaun no krítika konstrutiva bá orsamentu ne’ebé Governu aprezenta.
Tanba ne’e, líder másimu IX Governu Konstitusionál husu bá deputadu sira atu alerta nafatin no halo fiskalizasaun másimu bá Governu iha terrenu liu-liu bá ezekusaun orsamentu ne’ebé aprova daudaun, nune’e hamutuk servi povu ida-ne’e ho di’ak.
Perante Uma Fukun ida-ne’e, Primeiru Ministru deklara katak, Governu ida-ne’e iha kompromisu bá jestaun ida transparente.
Nune’e, Primeiru-Ministru Xanana Gusmão sita mensajen Sua Santidade Papa Francisco katak, murak me‘an ne’ebé Timor-Leste iha maka ninia ema, tanba ne’e OJE 2025 Governu tau prioridade bá Timoroan sira.
Sesaun plenária ne’e prezide hosi Prezidente Parlamentu Nasionál, Maria Fernanda Lay, akompaña hosi membru meza sira no hetan prezensa hosi membru Governu sira.
Komisaun C ne’ebé trata asuntu Finansas Públikas mak sei elabora redasaun finál antes haruka bá Prezidente Repúblika hodi promulga.
Proposta OJE 2025 ho montante Billiaun $2.6 ne’ebé IX Governu Konstitusionál aprezenta ho Lema “Investimento em infraestrutura estratégicas, reforço da economia e melhoria do bem-estar dos cidadãos”, ho votus 42 afavór, 23 kontra no 0 abstensaun.
Notisia relevante:PPN hato’o agradesimentu ba deputadu sira partisipa iha debate OJE 2025
Jornalista: Hortencio Sanchez
Editór: Florencio Miranda Ximenes
