DILI, 21 novembru 2024 (TATOLI) – Komisáriu Komisaun Anti-Korrupsaun (CAC, sigla portugés), Rui Pereira dos Santos, dehan selebrasaun loron mundial anti-korrupsaun, CAC sei priénse ho atividade vizita supreza ba instituisaun hodi taka estiker anti-korrupsaun hodi konsiénsializa funsionáriu Estadu atu labele fó no simu osan husi ema seluk bainhira halo atendimentu públiku iha oras servisu.
Aleinde ne’e, CAC halo monitorizasaun ba projetu sira iha Dili laran ne’ebé empreza ladauk konklui no sei halo semináriu nasionál kona-ba pevensaun no kombate korrupasaun “Kompromisiu Estadu hodi luta kontra korrupasaun ba prosperiedade povu nian”.
“Komisaun Anti-Korrupasaun konvida nain hira sira mai iha ne’e tanba ami atu partilla informasaun kona-ba atividade sira ne’ebé ligadu ho komemorasaun loron internasionál anti- korrupsaun ne’ebé mak sei akontese iha 9 dezenbru tinan ne’e. Atividade sira ne’e mak halo vizita supreza ba intituisaun Estadu sira tau sticker no halo inspesaun no monitorizasaun projetu sira estadu ninia iha Dili laran no ita sei halo semináriu nasionál iha 9 dezembru”, Rui Pereira hateten ba jornalista sira iha nia kna’ar fatin, kinta ne’e.
Nia dehan, CAC halo fiskalizasaun no monotorizasaun ba projetu sira iha Dili laran tanba iha lei númeru 7/2020, 26 agusto kona-ba Medida Prevensaun no Kombate Korrupsaun iha artigu balun ezije emprezáriu sira ne’ebé mak hetan fiar husi Estadu, tenke jere projetu sira ne’e ho responsablidade.
“Ita bo’ot haree projetu ne’ebé mak agora daudaun ita haree mak monumentu 12 novembru iha semitériu Santa-Cruz ne’ebé seidauk finaliza, tanba dehan sasan sira hanesan estatua mai husi Portugal tanba ne’e CAC fó hanoin para empreza bele finaliza tiha projetu ne’e”, nia adianta.
Santos hateten, selebrasaun loron internasionál anti-korrupasaun ne’e mós CAC sei halo mós semináriu nasionál ida hodi konvida Parlamentu Nasionál hanesan segundu orgaun soberania iha Timor-Leste hodi mai partilla kona-ba Timor-Leste nia polítika ba prevensaun no kombate korrupasaun.
“Ami haruka ona karta ba prezidente parlamentu no bankada parlamentár lima, atu bele prevene no kombate korrupasaun. Sá lejislasaun mak ita presiza atu hodi ba prevensaun no kombate korrupasun ne’e sira mak bele tau iha prioridade”, nia afirma.
Nia rekorda, Komisáriu informa ona kona ba lei asset recovery ne’e importante tanba ne’e mak ita-nia Parlamentu Nasionál hamutuk ho Governu atu haree ida-ne’e.
Nia hatutan, iha selebrasaun loron internasional anti-korrupasaun tinan ne’e sei konvida Prezidente Repúblika José Ramos Horta hodi halo abertura ba semináriu nasionál ne’e hodi fó nia mensajen kona-ba medida prevensaun no kombate korrupasaun.
Jornalista: Natalino Costa
Editór : Zezito Silva
