DILI, 22 novembru 2024 (TATOLI) – Prezidente Autoridade Protesaun Sivil (APC, sigla portugés), Jesuino Matos dos Reis Carvalho, dehan APC koopera ho Australia Humanitarian Partnership no prontu proteje komunidade sira husi risku dezastre naturál.
Reis afirma, kooperasaun ida-ne’e importante atu Governu hamutuk ho Australia Humanitarian Partnership no parseiru sira seluk hodi bele fó asisténsia ba komunidade bainhira hetan dezastre inklui fó hanoin ba sira hodi hadook aan husi fatin risku ba dezastre.
“Ami hanesan reprezentante Governu hamutuk autoridade lokál haloparseria ho Australia Humanitarian Partnership atu bele trata redusaun risku ba dezastre no fó hanoin ba komunidade sira atu prevene aan husi fatin risku dezastre”, Jesuino Matos hateten ba jornalista sira hafoin partisipa serimónia reflesaun kooperasaun ba projetu Timor-Leste Disaster Ready ne’ebé hala’o iha Tower Fatuhada, sesta ne’e.
Tuir nia, parseiru sira durante ne’e fó apoiu makas ba Governu hodi kontribui ba konsiensializasaun komunidade sira atu hadook aan husi risku dezastre.
“Liuhusi kooperasaun sira ne’e ita hamutuk hodi salva no proteje komunidade sira husi risku dezastre. Durante ne’e parseiru Australia Humanitarian Partnership sira mak ajuda Governu hodi kontribui ba konsiensializasaun komunidade hodi hadook aan husi fatin risku ba dezastre. sira no mós apoiu fasilidade serene iha sede suku sira kuandu mosu rai nakdoko, automatikamente serene fó alarma ba ita”, nia adianta.
Nia dehan, programa ba autoridade protesaun sivil, ba tinan oin, sei mantein aposta ba formasaun simulsaun ba sistema alerta sedu ba dezastre
“Tinan 2025, ami kontinua ami-nia lei protesaun sivil hodi servi no proteje povu. Reforsa ami-nia ekipa bainhira akontese asidente ruma, ami prontu fó asisténsia”, nia dehan.
Reprezentante Australia Humanitarian Partnership, Fiona Maheen, akresenta Australia komprometidu apoiu Timor-Leste iha área dezastre naturál.
“Ami halo kooperasaun ho Governu Timor-Leste iha ámbitu ida-ne’e ho Autoridade Protesaun Sivil ba projetu hanaran “Timor-Leste Disaster Ready” ne’ebé envolve Xefe Suku. Aleinde ida ne’e ami halo sosializasaun ba komunidade hodi hadook aan husi fatin risku”, nia afirma.
Jornalista: Natalino Costa
Editór : Zezito Silva
