DILI, 22 novembru 2024 (TATOLI) – Federasaun Voleiból Timor-Leste (FVTL) realiza kompetisaun Voleiból ba segunda divizaun hodi komemora loron 28 Novembru ne’ebé hala’o iha Jinaziu Dili. Atividade ne’e abertura direita husi Ministru Juventude, Desportu, Arte, no Kultura (MJDAK), Nelyo Isaac Sarmento.
Iha intervensaun Ministru Nelyo husu ba jogadór sira atu hala’o jogu ho étika, no respeitu ba malu entre jogadór, árbitru no seluk tan.
“Ita tenke promove jogu justu no profisionalizmu iha voleiból. Jogadór sira tenke respeita malu, árbitru sira, no hatudu étika desportiva hodi inspira públiku no hasa’e jogu,” dehan Governante ne’e, iha Jinaziu Dili, ohin.
Ekipa ne’ebé kompete iha jogu ne’e mane klube hitu no feto klube haat.
Atividade ne’e la’o tanba apoiu orsamentu husi MJDAK hamutuk rihun $8.000. Entrenatu orsamentu ne’e sei realiza mós jogu ba primeira divizaun sei hala’o iha fulan-oin.
Kompetisaun ne’e halo parte iha programa anuál FVTL nian, ne’ebé inklui divizaun xave rua.
Divizaun Daruak serve hanesan ronde kualifikasaun, bainhira ekipa haat feto rua no mane rua hatudu prestasaun iha jogu sei avansa ba primeira divizaun.
Kompetisaun ba Primeira Divizaun hatudu jogadór sira ho nivel abilidade no dezempeñu ne’ebé aas, no sai hanesan plataforma ida hodi identifika atleta potensiál sira ba ekipa nasionál Timor-Leste nian.
Notisia relevante: FVTL planeia realiza liga iha outubru-dezembru
Jornalista: Hortencio Sanchez
Editór: Florencio Miranda Ximenes
