DILI, 22 novembru 2024 (TATOLI) – Tribunál Judisiál Primeiru Instánsia Dili (TJPID), liuhusi Juiz prosesu José Gonçalves, iha sesta (22/11), ohin, hatún akordaun hodi kondena arguidu investigadór Komisaun Anti-Korrupasaun (CAC, sigla portugés) ho inisiál EFQ ho pena prizaun tinan ida no suspende ba tinan ida, tanba fatu sira provadu katak arguidu komete duni krime segredu justisa ne’ebé previstu iha artigu 274 husi Kódigu Penál Timor-Leste no konjuga ho artigu 74 husi Kódigu Prosesu Penál.
Iha sala julgamentu, Juiz prosesu José Gonçalves, pronunsia katak molok ne’e, Tribunál halo julgamentu ba krime segredu justisa ne’ebé envolve husi investigadór CAC na’in rua ho inisiál EFQ no FLGG.
“Durante julgamentu ba kazu ida-ne’e hafoin Tribunál halo tiha análize ba produsaun ba provas ba kazu ne’e, fatu sira iha julgamentu provadu duni katak arguidu EFQ komete duni krime segredu justis ne’ebé Ministériu Públiku imputa ba arguidu”, José deklara iha sala Julgamentu Tribunál Judisiál Primeira Instánsia Dili, sesta, ohin.
José relembra, iha 17 juñu 2023 arguidu EFQ nudar investigadór CAC hodi ezekuta mandadu husi Tribunál atu ba halo apreensaun no buska domisiliáriu hasoru Ministru asuntu Parlamentár no Komunikasaun Sosiál Fracisco Jeronimo iha nia rezidénsia Liquiça no Palásiu Governu, ba Set up box. Maibé momentu ne’e arguido, públika tiha madadu judisiáriu Tribunál nian ne’e iha arguidu nia konta facebook, tanba arguidu lamenta ho Komisáriu Anti-Korrupasaun (CAC, sigla portugés) Sergio Hornai nia deklarasaun ne’ebé hateten CAC seidauk konstitui Francisco Jerónimo ba arguidu.
“Provadu katak arguidu mós deklara iha julgamentu, nia rekoñese nia mak públika duni madadu judisiáriu Tribunál nian ne’e iha nia konta facebook, tanba arguidu lamenta ho Komisáriu Komisaun Anti-Korrupasaun Sergio Hornai nia deklarasaun momentu ne’eba ne’ebé hateten CAC seidauk konstitui Ministru Francisco Jeronimo ho nune’e arguidu konsidera katak deklarasaun Komisáriu nia ne’e hamate esforsu ekipa CAC nian iha momentu ne’ebá. Maibé tuir arguidu katak kuadu ema ne’ebé Tribunál hatún ona mandadu hodi halo buska ba nia ne’e nia estatutu automatikamente hanesan arguidu ona”, nia adianta.
Juiz ne’e dehan, arguidu EFQ ninia hahalok ne’e priénse ba krime segredu justisa ne’ebé punidu iha artigu 271 Kódigu Penál ne’ebé konjuga ho artigu 74 husi Kódigu Prosesu Penál, tanba ne’e Tribunál kondena arguidu ho pena prizaun tinan ida suspende ba tinan ida.
Tanba arguidu nudar investigadór ne’ebé sujeita ba prosesu buska no domisiliáriu hasoru Ministru Francisco tanba hetan orden husi Tribunál.
“Arguidu tuir lolos hanesan investigadór, nia la devia públika mandadu husi Tribunál tanba nia rasik sujeita ba prosesu buska nia mak investigador ida ne’ebé lidera ekipa ba halo buska, tanba ne’e Tribunál laiha dúvida kondena ho pena prizaun tinan ida suspende ba tinan ida”, nia afirma.
Nia dehan, violasaun segredu justisa ne’e ninia moldura penál tinan ida to’o tinan haat.
“Maibé Tribunál iha konviksaun foti de’it tinan ida hodi kondena arguidu ho pena prizaun tinan ida suspende ba tinan ida”, nia haktuir.
Juiz José husu ban EFQ atu ba oin hanesan investigadór labele komente tán hahalok ida hanesan ne’e. Arguidu FLGG Tribunál deklara absolve totál husi krime segredu justisa.
“Arguidu FLGG Tribunál deklara absolve sem kustu tanba arguidu FLGG T nia hahalok la priénse ba krime segredu justisa, Tanba arguidu momentu ne’e nia laos sujieta ba prosesu buska, maibé momentu ne’e nia hetan kontaktu husi investigadór CAC katak CAC halo hela buska iha Gabinete MAPKOMS iha Palásiu Governu nune’e arguidu hanesan ofisiál komunikasaun CAC nian foti inisiativa hodi públika asuntu ne’e iha pajina ofisiál CAC nian”, nia konklui.
Nia dehan, desizaun Tribunál nian, karik arguidu sira lamenta ba desizaun ne’e bele rekore desizaun Tribunál Judisiál Primeira Instánsia ba Tribunál Rekursu, loron aprezentasaun rekursu iha prazu loron 30 para defeza hatama rekursu.
Jornalista: Natalino Costa
Editór : Zezito Silva
