VIENTIANE, 25 novembru 2024 (TATOLI)— Sekretáriu Jerál ASEAN (Asosiasaun Nasaun sira Sudeste Aziátiku), Kao Kim Hourn husu jornalista nu’udar papél importante hodi fahe informasaun konaba impaktu positivu ASEAN ba nia komunidade membru sira.
Kao Kim Hourn hato’o asuntu ne’e liu husi Video Konferensia iha ASEAN Media Forum ou Fórum Mídia ASEAN 2024 ba dala-ualu ne’ebé halao iha sidade Vientiane, RDP Laos hodi diskute konaba Planu Mestre ba Konektividade ou Master Plan on ASEAN Connectivity (MPAC) ba tinan 2025.
Sekretáriu-Jerál ASEAN, Kao Kim Hourn hateten enkuantu ASEAN halo progresu signifikativu iha ninia komunikasaun públika iha tinan hirak nia laran, konxiénsia kona-ba ninia inisiativa no impaktu entre públiku en-jerál sei relativamente ki’ik iha estadu-membru barak. Sidadaun barak mak seidauk hatene kona-ba oinsá ASEAN afeta diretamente sira-nia moris no komunidade sira.
“Ida-ne’e destaka nesesidade urjente ba estratéjia komunikasaun sira ne’ebé hadi’a atu taka lakuna ida-ne’e. Ita tenke halo buat barak liután atu informa no envolve ita-nia povu sira kona-ba benefísiu sira husi integrasaun no kooperasaun rejionál, hodi haburas sentidu propriedade no orgullu ba ita-nia identidade ASEAN nian,” dehan Sekjer ASEAN.
Nia reforsa importante tebes atu haburas sentidu pertensa nian entre povu sira tanba subliña importánsia hosi kolaborasaun entre Sekretariadu ASEAN no mídia hodi hasa’e konxiénsia, promove komprensaun, no rezolve konseitu sala sira kona-ba ajenda integrasaun ASEAN nian.
Nia rekoñese fórum tinan ida-ne’e nian, partikularmente signifikativu tanba nia foka ba hasa’e konetividade no reziliénsia. Elementu rua ne’e krítiku ba ASEAN nia progresu no prosperidade ne’ebé kontinua iha polítika mundiál no ekonomia globál ohin loron nian ne’ebé muda lalais.
“Parte krusiál ida hosi reziliénsia ida-ne’e envolve adaptasaun ba era atuál hosi informasaun ne’ebé barak liu no narrativa sira ne’ebé polarizadu, iha ne’ebé perspetiva sira ne’ebé konflitu no informasaun sala dala barak domina espasu públiku sira,” Kim Kao informa.
Nia espera forúm ne’e sei fornese ba partisipante sira mídia nian hanoin sira ne’ebé iha valór kona-ba oinsá Estadu-membru sira ASEAN nian, iha kompromisu atu hadi’a Komunidade ASEAN nian.
“Ida-ne’e inklui integra ekonomia sira, harii futuru sustentável ida, no hakuak transformasaun dijitál. Ha’u mós hein katak ASEAN Media Forum sei aprofunda líder mídia sira-nia komprensaun kona-ba ASEAN nia funsionamentu internu no destaka oinsá sira bele hato’o ho efetivu istória ASEAN nian ba públiku,” nia hakotu.
Iha fatin hanesan Nicole Stechmann, Reprezentante Embaixada Alemaña ba RDP Laos nota katak sidadaun sira ASEAN nian presiza hetan informasaun kona-ba benefísiu sira ne’ebé integrasaun no kooperasaun rejionál oferese ba sira. Informasaun ida-ne’e hato’o ba sira liuhosi jornalizmu ho kualidade, hosi editór no jornalista sira hotu.
“Propagasaun informasaun sala no dezinformasaun, falsidade, narrativa manipulada no informasaun enganozu buras no sira nia influénsia bele iha impaktu prejudisiál ba sosiedade husi erozaun konfiansa iha instituisaun sira no to’o aprofundamentu divizaun entre komunidade sira. Jornalizmu ho kualidade sai hanesan ita-nia arma di’ak liu hasoru perigu dezinformasaun ida-ne’e. Ita-boot nia kompromisiu ho onestidade, ezatidaun no profundidade maka bele ajuda harii públiku ida ne’ebé reziliente, ida ne’ebé bele haree liuhosi tentativa sira atu lohi ka manipula,” Nicole Stechmann hateten.
Tuir nia, jornalizmu ho kualidade la’ós de’it hateten faktu sira maibé investiga, kestiona no kontestualiza. Tipu jornalizmu ida-ne’e eduka, fó kbiit no importante liu no proteje. Ida-ne’e haburas sosiedade ida ne’ebé informadu ho di’ak, la’ós fasil atu nakdoko hosi sensasionalizmu ka metade-verdade sira, maibé orienta hosi komprensaun di’ak ida kona-ba asuntu sira ne’ebé iha.
Repúblika Federál Alemaña nian iha nafatin kompromisu atu apoia Fórum Mídia ASEAN nian hanesan kanál komunikasaun ida hodi hasa’e konxiénsia kona-ba nesesidade ba koordenasaun no integrasaun rejionál no hodi fornese hanoin diretu sira kona-ba organizasaun nia objetivu sira iha futuru.
Nune’e mós Phosy Keomanivong, Vise-Ministru Informasaun, Kultura no Turizmu RDP Laos nota katak fórum ida-ne’e hola parte signifikativu hosi Planu Mestre Komunikasaun ASEAN nian 2018–2025 katak fornese palku mídia ida ba porta-vós ASEAN hotu-hotu, partikularmente Prezidente ASEAN nian.
“Ha’u sente kontente tebes atu haree belun no kolega barak hosi mídia halibur iha ne’e ba Abertura Fórum Mídia ASEAN nian ba dala-VIII iha tinan 2024. Hodi Ministériu Informasaun, Kultura no Turizmu nia naran, Laos PDR nian no nu’udar nasaun ko-anfitriaun iha kolaborasaun besik ho Sekretariadu ASEAN no GIZ, ha’u hakarak hato’o ha’u benvindu,” nia dehan.
ASEAN Media Forum ou Fórum Mídia ASEAN nian hanesan eventu anuál ida ne’ebé sai hanesan plataforma ida ba diálogu no kolaborasaun entre profisionál sira mídia nian, polítiku sira, no líder opiniaun xave sira iha komunidade ASEAN (Asosiasaun Nasaun sira Sudeste Aziátiku nian) ho apoiu husi GIZ (Organizasaun Alemaña).
Fórum ida-ne’e hakarak hasa’e komprensaun no kooperasaun entre estadu-membru sira liuhosi diskute asuntu oioin ne’ebé pertinente ba rejiaun, inklui liberdade mídia, integrasaun rejionál, no dezenvolvimentu sosio-ekonómiku.
Forum loron ida ne’e hetan partisipasaun maximu husi Jornalista 50 resin husi nasaun membru ASEAN nian hanesan Indonézia, Malázia, Singapura, Tailándia, Filipina, Brunei Darussalam, Vietname, Myanmar, Kamboja no RDP Laos rasik inklui Timor-Leste.
Jornalista : Cidalia Fátima
Editor : Armandina Moniz
