DILI, 26 novembru 2024 (TATOLI) – Komandu Polísia Nasionál Timor-Leste (PNTL), hahú, divulga polítika sustentabilidade seguransa nasionál ba Komandu Nasionál PNTL munisípiu sira, Komandante Unidade sira, Xefe Departamentu, Xefe Gabinete inklui membru sira atu ba futuru bele haforsa servisu institutusaun PNTL hodi hametin liután seguransa nasionál.
Xefe Gabinte Planu Estratéjiku Dezenvolvimentu, Komandu Jerál PNTL, Asistente Superintendente Polísia Carlito da Silva Adorio, subliña Konstitutuisaun RDTL fó biban ba Polísia atu garante seguransa nasionál, tanba ne’e, presiza iha polítika seguransa nasionál atu orienta membru sira bele la’o tuir.
“Komandu PNTL presiza divulga polítika sustentabilidade seguransa nasionál ba ne’ebé ita iha ona hodi divulga ba membru sira atu bele servisu ho diak atu iha futuru garante seguransa nasionál. Sé ita laiha orientasaun ne’ebé klaru, entaun ita-nia servisu iha terenu mós ladún furak. Tanba ne’e mak planu seguransa nasionál hodi ajuda ema ne’ebé kaer kna’ar ho responsablidade iha nivel munisípiu, departamentu mai to’o nasionál idaidak bele hatene nia funsaun ho di’ak”, Carlito da Silva hateten ba jornalista sira hafoin divulga polítika sustentabilidade seguransa nasionál ba Komadnante Munisípiu no membru sira iha Sentru Formasaun Polísia (CFP, sigla portugés) Comoro, tersa, ohin.
Carlito esplika, polítika seguransa nasionál foku liu ba jestaun operasionál, jestaun administrasaun, jestaun formasaun no jestaun disiplina.
¨Iha parte jestaun operasionál katak kada komandante munisípiu, komandu unidade no departamentu inklui gabinete idaidak hatene nia servisu rasik, atu ita bele ajuda ona seguransa nasionál¨, nia adianta.
Nia dehan, sistema seguransa nasionál ne’e kontempla iha asaun polísia ne’ebé real iha terenu hodi haree liu ba abordajen polísia nian, polísia ba komunidade sira haree ba oinsa apoiu sistema administrasaun, oinsa formasaun ne’ebé adekuadu hodi promove polísia nasionál iha futuru.
Iha fatin hanesan, Komandante Komandu Administrasaun, Superintendente Xefe Polísia, Natercia Martins hateten, PNTL iha misaun klaru ne’ebé define iha konstituisaun ne’ebé hateten fó seguransa interna ba ita-nia komunidade no mós nia bens atu realiza ida ne’e, ita presiza rekursu ne’ebé sufisiente no adekuadu.
Nia dehan, rekursu umanu, transporte operasionál no meiu sira seluk sai kestaun prioridade ba seguransa hodi bele apoia servisu.
“Tamba ne’e ita presiza iha planu ba seguransa nasionál ne’ebé klaru para ita bele lao tuir hodi bele atinje objetivu” nia konklui.
Jornalista: Natalino Costa
Editór : Zezito Silva
