DILI, 27 novembru 2024 (TATOLI)- Hafoin provizoriamente taka tanba komete infrasaun, Loja SEARA ne’ebé lokaliza iha Praia dos Coqueiros Dili, reativa fali sira-nia atividade komersiál husi Autoridade Inspesaun no Fiskalizasaun Atividade Ekonómika Sanitaria no Alimentar (AIFAESA).
“Atu informa fali ba publiku katak kona-ba infrasaun sira ne’ebé mak komete husi loja SEARA ne’ebé halo infrasaun repetida, entaun iha momentu loron 05 novembru ita taka loja refere ho temporariamente atividade komersializasaun no ohin ita loke fila fali ba publiku atu sira halo fali atividade negósiu,” Inspetora-jerál AIFAESA, Odete Viegas da Silva informa ba jornalista sira iha Loja SEARA Praia dos Coqueiros, ohin.
Inspetora-jerál AIFAESA, Odete Viegas rekorda, ekipa sira tuun ba iha terrenu no iha loron ne’e kedas taka estabelesimentu komersiál ne’e provizóriu. Maibé, tuirmai sira rasik ba iha ofisina Matadouru, Dili, hodi husu loke fila fali loja ne’e no ekipa operasionál AIFAESA tuun halo re-inspesaun dala tolu “No, ikus empreza rasik kumpri regras ne’ebe mak ami fó,” inspetora ne’e hateten.
Nia esplika, husi parte operasaun ba parte jurídiku katak banhira sira atu re-ativa fali loja,sira tenke selu koima purvolta $10 mil dolares, entaun empreza ne’e rasik aseita nune’e nia hakarak atu loke fila fali.
“Ohin dadeer ami enkontru no sira rasik aseita no ha’u rasik hateten katak se ita-boot aseita ita-boot ba selu iha Banku hodi lori resibu mai no ita-boot tenke asina deklarasaun ida-ne’ebé prepara husi jurídiku sira, entaun nia kumpri hodi asina no bainhira nia sei halo tan mak sei hetan infrasaun sei taka totál loja. Entaun sira aseita ho deklarasaun ne’e no sira asina molok loke fali sira-nia negósiu,” nia konta tuir.
Inspetora-jerál AIFAESA, Odete Viegas haktuir, “Ohin ekipa sira koordena ho ekipa tékniku sira seluk, maibé balun la disponível entaun hanesan inspetora-jerál informa ba públiku katak loja refere halo fila fali nia atividade negósiu. Ami-nia ekipa mós agora daudaun ba halo hela inspesaun ba loja sira iha territóriu nasionál tomak”.
Notísia relevante:AIFAESA taka provizóriu loja SEARA Pantai Kelapa tanba komete iregularidade
Jornalista : Felicidade Ximenes
Editór: Rafael Ximenes de A. Belo
