DILI, 05 novembru 2024 (TATOLI) – Inspetora Autoridade Inspesaun Fiskalizasaun Atividade Ekonómika Sanitária Alimentár, Institutu Públiku (AIFAESA,I.P), Odete Viegas da Silva, informa ekipa konjunta taka temporariamente loja SEARA durante fulan ida tanba komete iregularidade.
Ohin AIFAESA hamutuk ho ekipa konjunta sira hanesan Institutu Traballu, Servisu Rejistu no Verifikasaun Emprezariál, Institutu Públiku (SERVE, I.P), Ministériu Komérsiu no Indústria (MCI), PNSIK, Imigrasaun taka provizóriu loja SEARA Praia dos Coqueiros.
“Ita mai taka provizóriu loja SEARA Pantai Kelapa tanba loja ne’e rasik halo atividade negósiu hahú iha 2022 no komete infrasaun hanesan, faan produtu liu prazu, falsifikasaun ba validasaun data no ida seluk mak lisensa la tuir enderesu signifika sira husu lisensa iha fatin ida, maibé loke negósiu iha fatin seluk”, Odete Viegas da Silva informa ba jornalista sira iha Loja SEARA Praia dos Coqueiros, ohin.
Nia hateten, iha fulan kotuk outubru ne’e, sira komete erru hanesan produtu liu prazu no sira nafatin falsifika data validasaun naan sira ne’ebé mak nia produsaun iha kedas 2021-2022, sira repeaking fali iha 2024-2025, entaun ida-ne’e situasaun ne’ebé mak grave tebes.
“Depois sira-nia armajenamentu mós la tuir ona kondisaun ne’ebé mak apropriadu hanesan temperatura ne’ebé mak ita boot sira tau la tuir ona kritériu ne’ebé mak iha, entaun estabelesimentu hahú ohin sei taka temporariamente to’o fulan ida, maibé la prejudika traballadór sira-nia direitu, ita boot sira iha dever nafatin selu, horsida enseramentu iha oin, maibé iha kotuk nafatin biban ba ita boot sira atu hadia ita boot sira nia kondisaun tuir kritériu ne’ebé mak iha”, nia afirma.
“Ita tenke proteje, se ita boot sira viola lei, ita boot sira mós hetan sansaun tuir prosesu ne’ebé mak ita boot sira komete, erru hanesan ne’e sei taka totalmente. Ita haree sansaun ne’ebé mak AIFAESA fó, hahú husi $250, maibé másimu to’o rihun $50, maibé ida-ne’e depende ba sira-nia erru ne’ebé mak komete”, nia haktuir.
Iha fatin hanesan, Inspetór Jerál Traballu, Frederico Pereira de Matos, hateten relasaun ho inspesaun konjunta ida ohin ne’e, AIFAESA identifika katak Empreza SEARA halo iregularidade grave no repetidu ba buat ne’ebé mak nia hetan ona notifikasaun, maibé laiha obidénsia ba regra sira ne’ebé mak regula.
“Haree husi aspetu traballu ninian, ami mós husu ba empreza atu asegura nafatin direitu traballadór nian durante suspensaun maske oin ne’e taka, maibé servisu iha kotuk tenke aruma sasan, halo identifikasuan ba sasan sira hotu tuir rekezitu ne’ebé mak AIFAESA identifika ona katak prazu liu ona tenke haketak, entaun traballadór sira mak sei servisu ida-ne’e, entaun mesmu laiha ona atendimentu ba konsumidór maibé traballdór sira fulan ida ne’e empreza nia dever atu asegura nafatin traballadór sira-nia direitu hodi fó servisu ba sira nafatin, asegura sira-nia saláriu hodi hein desizaun ida ne’ebé mak mai husi AIFAESA”, Matos dehan.
Notísia relevante : SEARA rekoñese faan produtu ne’ebé liu prazu no prontu simu sansaun
Jornalista : Felicidade Ximenes
Editór : Zezito Silva
