BAUCAU, 27 novembru 2024 (TATOLI) – Veteranu kombatente libertasaun nasionál husu Baucau oan atu hamutuk hodi kontribui ba prosesu dezenvolvimentu.
Veteranu Custódio Belo ‘Alin Laek’, esplika, munisípiu Baucau uluk tempu luta sai bee-matan hodi sustenta FALINTIL sira hodi liberta Timor-Leste hosi okupasaun Indonézia nune’e tempu ona atu fó liman ba malu hodi kontinua luta liuhosi kontribuisaun ba dezenvolvimentu nasionál.
“Agora ukun aan ona sai nafatin bee-matan atu simu dezenvolvimentu, tanba ne’e husu ba juven sira imi-nia obrigasaun mak tenke estuda,” Veteranu Alin Laek hateten iha Sentru Konvensaun Baucau (CCB, sigla portugés), kuarta ne’e.
Eis gerrilleiru ne’e husu atu joven Baucau oan labele uza tan kroat atu kontra malu tanba tempu uitiliza kroat hotu ona maibé ukun aan ona tenke uza fali kakutak nune’e labele kontra prinsípiu luta veteranu sira-nia.
Veteranu kompromete sei sai lalenok matadalan ba foin sa’e sira hanesan fó oportunidade inklui fasilita atu asesu ba kampu traballu no kontinua aprende iha universitáriu.
“Ha’u husu atu fó liman ba malu nune’e bele goja eroi sira-nia sakrifísiu,” Alin Laek enkoraja.
Bainhira Baucau oan fó liman ba malu hatudu unidade sei iha benefísiu hodi goja ukun aan ne’ebé rezultadu maihosi eroi sira-nia luta durante tinan-24 laran.
Notísia relevante: Kombatente na’in-788 simu medalla kondekorasaun iha Baucau
Jornalista : Natalino Belo
Editór : Evaristo Soares Martins
