DILI, 27 novembru 2024 (TATOLI) – Xefe Departamentu Tránzitu Seguransa Rodaviaria Nasionál Asistente Superintendente Xefe Polísia Luis da Costa, hateten husi fulan-Janeiru to’o fulan-Outubru kontribui reseita ba Estadu hamutuk $813.393.
“Hahú janeiru to’o outubru, Polísia Nasionál Timor-Leste liuhusi Departamentu Polísia Tránzitu Rodaviaria ita konsege $813.393”, Luis da Costa hateten ba jornalista sira iha nia kna’ar fatin Komandu Jerál PNTL Caicoli, kuarta ne’e.
Costa dehan, reseita sira ne’e mai husi atividade check point ba viatura sira ne’ebé halo husi servisu polísia tránzitu nian iha munisípiu hotu inklui tránzitu nasionál.
“Reseita sira ne’e mai hosi infratór sira kontra orden autoridade tránzitu, tuir fali mak la lori dokumentu orijinál no karreta ho motór ne’ebé mak kontra sinais tránzitu”, nia adianta.
Nia dehan, Komandu PNTL munisípiu hatama reseita barak liu mak komandu munisípiu Dili, tránzitu nasionál, komandu PNTL Munisípiu Aileu, Komandu Munisípiu Bobonaro no komandu Munisípiu Baucau, portantu husi munisípiu seluk ne’e ladún hatama reseita ba kofre Estadu tanba atividade tránzitu ladún efetivu.
Luis mós relata katak hahú husi fulan-Janeiru to’o fulan-Outubru, Departamentu Tránzitu Rodaviária rejista kazu asidente tráfegu hamutuk 1.832, husi númeru ne’e kanek todan iha ema 389, kanek kaman mak 210 no ema mate iha 104. Prosesa ba Tribunál ho totál 89, konsege rezolve iha Tribunál mak 28, totál kazu hamutuk 910 mak rezolve tuir família.
“Husi asidente tráfegu ne’e maioria tanba fatór umanu tanba ita ladún fó atensaun bainhira lori karreta no motór”, nia informa.
Tanba ne’e, aproveita mós atu aviza ba komunidade sira ne’ebé mak kondús transporte públiku atu nafatin kumpre regra ne’ebé polísia nasionál Timor-Leste impoen, iha lei númeru 6/2003, tránzitu seguransa rodoviaria.
“Bem, asidente, ita ema ida lahanoin atu soke ema. Dezastre ne’e ita hotu la espera tanba husu ba hotu ne’ebé lori karreta no motór tenke kontrola uluk imi-nia motorizada no karreta nia kondisaun molok halo viajen no lori karreta no motór ne’e tenke kuidadu tanba asidente dala barak akontese envolve joven sira tanba husu imi kuidadu aan”, nia afirma.
Nia dehan, atu redús asidente tráfegu ne’e, Polísia Nasionál Timor-Leste liuhusi Polísia Tránzitu parseiru ho Diresaun Nasionál Transporte Terrestre (DNTT ) sempre halo sosializasaun ba sidadaun katak oinsa disiplina hodi utiliza transporte iha via públiku.
“Asidente ne’e akontese iha estrada públiku, kuaze persentajen bo’ot, ne’e juventude sira tanba ne’e mak ita nafatin aviza para ita-nia joven sira konsiente, kuidadu bainhira kondús viatura tanba dala barak sira la kumpre regras, dalabarak sira kondús transporte ho velosidade aas ho kondisaun lanu, ida-ne’e mak hodi rezulta asidente ne’ebé iha estrada públiku envolve joven barak tanba ami kontinua sosializa atu prevene asidente sira iha dalan públiku ne’ebé envolve ita-nia joven sira”, nia konklui.
Jornalista: Natalino Costa
Editór : Zezito Silva
