BAUCAU, 28 novembru 2024 (TATOLI) – Governu liuhosi Ministériu Edukasaun (ME) husu povu hotu atu prienxe ukun aan liuhosi serbisu hamutuk nune’e atinji mehi eroi sira-ne’ebé mate hodi liberta nasaun.
Ministra Edukasaun, Dulce de Jesús, esplika, prezensa iha Baucau nu’udar parte ezekuta oreintasaun hosi Xefe Governu hodi selebra serimónia hasa’e Bandeira Nasionál iha loron Proklamasaun Independénsia 28 novembru ba da-49.
“Ita-nia serbisu mak atu prezense ukun rasik aan ida-ne’e nune’e bele atinji eroi sira-nia mehi,” Ministra Edukasaun hateten iha resintu administrasaun Munisipál Vila Nova, kinta ne’e.
Governante ne’e apela liuhosi selebrasaun loron istóriku ne’e bele fó korajen no unidade tuir mensajen Prezidente Repúblika ne’ebé foka ba pas nune’e hamutuk bele kontribui ba prosesu dezenvolvimentu iha Timor-Leste.
Dulce hato’o omenajen ba eroi saudozu lutadór sira ne’ebé mate no apresia nafatin veteranu sira ne’ebé luta hodi Timor-Leste hetan ninia independénsia.
“Durante ichar bandeira programa di’ak tebes, iha animasaun, iha partisipasaun husi FFDTL, estudante, veteranu ne’ebé halao knár no funsaun diak,” Dulce de Jesús akresenta.
Jornalista : Natalino Belo
Editór. : Evaristo Soares Martins
