DILI, 01 dezembru (TATOLI)-Polisia Nasional Timor-Leste (PNTL) liuhusi Departamentu Investigasaun Kriminál (DIK) Nasionál asegura Membru PNTL na’in haat husi Komandandu PNTL Liquiça tanba suspeitadu envolve iha kazu kobransa ilegál.
Kazu ne’e akontese iha sábadu (30/11) horseik iha tuku 22:00 kalan bainhira membru nain haat ne’e halo servisu pasa revista ba karreta no motor iha área Liquiça nian, iha pasa revista membru PNTL na’in haat ne’e haree karreta ida hatama sasan kontra bandu hanesan fugetis tula husi Fronteira mai to’o iha mai iha área Liquiça
Hatene tiha ida-ne’e, membru PNTL haat la halo atuasaun ho profisionál tuir lei maibé sira nain haat mak fasilita fali na’in ba fugetis tula iha karreta polísia nia inklui fugetis kaixa haat tula husi Liquiça Mai iha Dili nune’e tuir dalan membru PNTL ne’e husu osan ba na’in ba fugetis ne’e ho valór $250.
Bainhira to’o Mai iha area Santa-Cruz Munisípiu Liquiça nian ekipa sekreta deteta membru PNTL na’in haat Nia movimentu, nune’e kontaktu kedan ba Departamentu Investigasaun Kriminál Nasionál hodi asegura Membru PNTL nain haat nee.
Ho hahalok membru PNTL nain haat ne’e na’in ba karreta hato’o keixa ba PNTL nunee iha domingu (01/12) ohin, Departamentu Investigasaun Kriminál Nasionál asegura kedan Membru PNTL nain ha’at hodi lori mai kedan Departamentu Investigasaun Kriminál Nasionál Komandu JerÁl PNTL Caicoli hodi submete ba prosesu identifikasaun.
Hafoin Departamentu Investigasaun Kriminál Nasionál asegura tiha membru PNTL na’in haat ne’e PNTL asegura mÓs sasan fugetis kaixa (Dos) haat ne’ebé hatama husi fronteira Batugade nu’udar objetivu krime.
Bainhira Jornalista TATOLI konfirma ba Xefe Departamentu Investigasaun Kriminál Nasionál Superintendente Xefe, João Belo, hateten, kazu ne’e sei iha hela prosesu investigasaun nia laran tanba DIK seidauk bele relata buat balun relasiona ho ida-ne’e.
“Investigasaun sira sei halo nia servisu,” Superintendente Xefe João Belo hateten ba TATOLI via telefone domingu, ohin.
Tuir observasaun TATOLI iha terenu katak agora daudaun membru PNTL nain haat ne’e Departamentu Investigasaun Kriminál Nasionál halo hela identifikasaun ba sira.
Jornalista: Natalino Costa
Editór: Rafael Ximenes de A. Belo
