DILI, 03 dezembru 2024 (TATOLI) – Tribunál Judisiál Primeira Instánsia Dili (TJPID), tersa (03/12), ohin hasai despaixu hodi liberta totál arguidu na’in-neen husi sala detensaun.
Desizaun ne’e fó sai liuhusi interrogatóriu dahuluk ba krime danu agravadu ne’ebé envolve husi arguido hirak ne’e, ho inisiál JM, RLdC, JdC, C, SPS no DdC.
Tribunál liuhusi Juiza Julmira Auxiladora, fó sai hodi liberta totál arguidu na’in-neen husi sela detensaun tanba detensaun ne’ebé PNTL halo latuir rekezitu legál.
Defensór Publiku Marcal Masquerinhas, akresenta Tribunál hasai despaixu ikus hodi fó liberdade ba arguido sira tanba la tuir lei.
“Detensaun ne’e iha rua, detensaun por fraglante delito no fora fraglante delito. Sira ne’e polísia ba halo detensaun no ohin lori mai Tribunál katak fraglante delito. Afinál detensaun sira laos fraglante delito. Tanba depois kazu ne’e akontese iha madrugada no iha dader tuku 10 mak PNTL ba foti sira iha uma”, Masquarinhas hateten ba jornalista iha Tribunál Dili, tersa, ohin.
Nia esplika, tuir lei kuandu krime ne’e laos fraglante delito mak liu tiha ona oras, entaun polísia atu ba foti suspeitu ida-ne’e tenke bazea ba mandadu judisiáriu maibé kuandu laiha mandadu ne’e labele.
“Momentu polísia foti sira ne’e iha fora fraglante delito tanba polísia ba foti sira iha uma tuir lolos polísia atu ba foti sira iha uma ne’e tenke bazea ba mandadu detensaun husi Tribunál. Maibé tanba laiha mandu detensaun husi Tribunál nian, entaun ha’u nia kliente sira Tribunál tenke liberdade hotu”, nia adianta.
Nia dehan, Ministériu Públiku promove arguidu na’in-neen ne’ebé komete krime danu agravadu 260 previstu iha artigu 260 husi Kódigu Penál Timor-Leste, tanba sira-nia hahalok ne’e harahun komunidade nia uma no sasan sira.
“Krime ne’ebé Ministériu Públiku imputa ba ha’u-nia kliente sira ne’e krime ne’e kontinua lao. Ministériu Públiku kontinua prosesa ba oin ka kontinua investiga. Ba kazu ne’e sei nafatin. Ohin ne’e Tribunál nia despaixu ne’e liberta totál sira husi sela detensaun tanba buat ne’ebé polísia aprezenta ne’e la tuir lei hotu, laiha mandadu judisiáriu”, nia haktuir.
Rekorda fali katak arguidu nain-neen ho inisiál JM, RLdC, JdC, C, SPS no DdC, envolve iha konfrontu tuda malu entre joven ho joven ne’ebé akontese iha area Gan 46 Hudi-Laran, Postu Administrativu Dom Aleixo, Munisípiu Dili iha sábadu (30/11) foin lalais ne’e no iha konfrontu ne’e rezulta komunidade nia uma balun rahun inklui edifísiu Jornál Independente nia vidru rahun.
Jornalista: Natalino Costa
Editór : Zezito Silva
