DILI, 04 dezembru 2024 (TATOLI) – Tribunál Judisiál Primeira Instánsia Dili (TJPID) hasai akordaun hodi deside absolve totál dosente na’in-rua, Universidade da Paz (UNPAZ) ho inisiál JGdS, FTB no MLS husi krime abuzu konfiansa agravada tanba durante julgamentu fatu sira la provadu katak arguidu na’in-tolu ne’e komete krime abuzu konfiansa agravadu ne’ebé previstu iha artigu 257 husi Kódigu Penál Timor-Leste.
Tuir akordaun ne’ebé Tribunál hatún ne’e deskreve katak laiha fatus sufisiente ne’ebé atu kondena arguidu nain-tolu ba krime ne’ebé Ministériu Públiku imputa ba sira.
“La provadu katak arguidu na’in-tolu ne’e envolve iha krime abuzu konfiansa agravadu. Tanba ne’e Tribunál deside absolve arguidu nain JGdS, FTB no MLS nudar kou autór ho forma konsumada husi krime abuzu konfiansa agravadu ne’ebé previstu iha artigu 257 husi Kódigu Penál Timor-Leste”, hateten husi akordaun Tribunál nian ne’ebé Tatoli asesu, kuarta, ohin.
Hatan ba desizaun ne’e, Defeza Arguidu na’in-tolu, Advogadu Privadu Olivio Barros, hateten iha prosesu ida-ne’e Tribunál Judisiál Primeira Instánsia Dili nian desizaun ikus liu absolve arguidu na’in-tolu ne’e sem kustu husi akuzasaun ne’ebé Ministériu Públika aprezenta mai Tribunál.
Nia dehan, desizaun ne’e Tribunál Judisiál Primeira Instánsia Dili foti iha dia 25 novembru 2024.
“Iha desizaun ne’e ho klaru katak arguidu na’in-tolu Tribunál lakonsege haree katak sira iha responsablidade kriminál ba krime ne’ebé Ministériu Públiku imputa ba sira”, nia haktuir.
Defeza ne’e dehan, antes ne’e iha alegasaun Ministériu Públiku husu atu arguidu sira devolve fia fali osan ne’ebé lakon ho montante rihun hitu.
“Maibé fatu no prova sira Tribunál haree la sufisiente no laprovadu hodi hatudu katak arguidu na’in-tolu ne’e mak kulpadu duni ba krime ne’ebé Ministériu Públiku imputa ba sira¨, nia adianta.
Barros hateten, hanesan defeza husi arguidu sira nian simu desizaun ne’e.
Nia dehan, desizaun ida-ne’e seidauk tranzita enjuladu, ida-nee foin desizaun husi Tribunál Primeiru Instánsia nian, kuandu Ministériu Públiku la aseita desizaun ida-ne’e tuir lei iha prazu loron 30 para hodi kontesta desizaun Tribunál Judisiál Primeira Instánsia nian.
Rekorda fali katak arguidu na’in-tolu ho inisiál JGdS, FTB no MLS Ministériu Públiku akuza arguidu na’in-tolu ba krime abuzu konfiansa tanba arguidu na’in-tolu suspeita uza osan Universidade da Paz (UNPAZ) ho valór kuantia rihun hitu maibé laiha relatóriu eskritu utilizasaun ba osan nee.
Jornalista: Natalino Costa
Editór : Zezito Silva
