DILI, 05 dezembru 2024 (TATOLI) – Ministeriu Justisa, atualmente, prepara hela esbosu lei Orden Advogadu molok lori ba diskute iha Konsellu Ministru.
¨Ita halo ona lei kona-ba Advogadu ninia ne’ebé hanaran ordem dos advogados. Lei orden advogadu ida -ne’e atu regula advogadu sira. Esbosu ita halo tiha ona, ita submete ona ba señora Lucia ninian fatin no agora ami sei iha hela koordenasaun para lei ida-ne’e bele lori ba Konsellu Ministru atu halo diskusaun¨, Ministru Justisa, Sergio Hornai, hateten iha nia intervensaun bainhira sai oradór iha serimónia ho tema ¨Direitu Prizioneiru hodi asesu ba justisa ne’ebé organiza husi Asosiasaun HAK, ne’ebé hala’o iha salaun Centro Nacional Chega, Balide, kinta ne’e.
Ministru esplika, lei orden advogadu ida-ne’e importante, ida-ne’e laos atu regula Advogadu de’it maibé lei ne’e ninia ejizénsia atu hatán mós ba organizasaun komérsiu mundiál ne’ebé ita sai ona Estadu membru no seluk mós lei ne’e atu hatán ba adesaun Timor-Leste nian ba ASEAN.
¨Tanba iha mobilidade, sasan no ema sira hakarak bainhira iha disputa sira hakarak arbitrazen buat sira ne’e, sira kuandu iha problema ruma tenke lalais para solusiona, se lae ema dehan di’ak liu, ha’u investe ha’u-nia rai dúke ha’u ba Timor, ninia birokrasia kleur la halimar no ha’u laiha mandatáriu ida ke atu bele fo asisténsia ba ha’u¨, nia adianta.
Koordenadór ekipa traballu ba reforma setór justisa, Lucia Lobato, adianta tinan oin ekipa traballu ba reforma justisa sei hamutuk ho Ministru Justisa no autór judisiáriu sira seluk halo diskusaun ba diploma tolu, ida mak lei ordem dos advogados atu regula advogadu privadu sira-nian servisu, alterasaun estatutu majistradu judisiáriu, estatatu ba Ministériu Públiku no Defensoria Públika.
¨Ita tenke iha aleterasaun lubuk ida ba estatutu sira majistradu judisiáriu, Ministériu Públiku no Defensór Públiku. Atu bele regulariza servisu sira ne’e ho di’ak atu Defensór Públiku ne’ebé malandru dehan hakarak simu osan de’it, kuandu investigasaun mak hetan sira halo prátika ida-ne’e, favor ida haloot sasan ba servisu fali fatin seluk, labele mai tan iha defensoria públika¨, nia afirma.
Nia dehan, Juiz sira mós hanesan, dalaruma ba teste kareira dala tolu ka dala haat mak la pasa ona, favór ida sai ona husi fatin ne’e.
Jornalista: Natalino Costa
Editór : Zezito Silva
