DILI, 06 dezembru 2024 (TATOLI) –Prezidente Repúblika, José Ramos-Horta, sesta ne’e, iha edifisiu Ministériu Negósiu Estranjeiru no Kooperasaun (MNEK), hodi halo lansamentu ba livru “The Sky is Ours”, kona-ba halibur diskursu husi Primeiru-Ministru, Kay Rala Xanana Gusmão, kona-ba Unidade, Prosperidade no Dezenvolvimentu iha Timor-Leste.
Diskursu sira iha livru ne’e kompila husi Prezidénsia Konsellu Ministru, Hermenegildo Augusto Cabral Pereira “Agio Pereira” no sai mós responsável ba produsaun livru ne’e.
“Livru ne’e versaun ho lian inglés, iha mós versaun lian portugés, ne’e hanesan diskursu no entrevista no testu oinoin ne’ebé Maun Xanana halo iha tinan lubuk ida nia laran, Maun Xanana hakerek di’ak tebes 100% intermu nia ideia no konseitu no elegansia eskrita,” Ramos Horta hateten hafoin halo lansamentu ba livru ne’e.
Horta dehan, orgullu halo lansamentu ba livru ne’e no obra mai husi lider Kay Rala Xanana Gusmão.
Diskursu sira iha livru ne’e kompila hosi Prezidénsia Konsellu Ministrus, ne’ebé responsável mós ba produsaun livru ne’e.
“The Sky is Ours” hanesan obra ida ne’ebé halibur diskursu no reflesaun prinsipál sira hosi Sua Exelénsia Primeiru-Ministru, Kay Rala Xanana Gusmão, ne’ebé hato’o entre tinan 2017 no 2024.
Livru ne’e ko’alia kona-ba tema sira hanesan unidade nasionál, prosperidade no dezenvolvimentu sustentável, hodi destaka dezafiu no konkista sira ne’ebé forma trajetória nasaun nian ba konstrusaun futuru ida ne’ebé inkluzivu no reziliente.
Iha ninia pájina tomak, Kay Rala Xanana Gusmão reflete kona-ba kna’ar krusiál lideransa nian no esforsu hamutuk hodi ultrapasa situasaun-susar, ne’ebé destaka importánsia atu prezerva identidade kulturál, promove justisa sosiál no hametin aliserse demokrátika sira.
Serbisu ne’e subliña mós kompromisu Timor-Leste nian ba dezenvolvimentu ekonómiku ne’ebé sustentável no konsolidasaun dame nu’udar riin esensiál ba progresu.
Tema sentrál sira seluk ne’ebé mak iha livru ida-ne’e nia laran maka prosesu adezaun plena Timor-Leste nian ba ASEAN, nu’udar pasu estratéjiku ba kreximentu nasionál.
Diskursu sira ne’ebé kompila ona hatudu Timor-Leste nia aliñamentu ho valór sira ASEAN nian, hanesan promove dame no kooperasaun rejionál, no reflete kona-ba oportunidade sira ba dezenvolvimentu ekonómiku, hametin relasaun diplomátiku no interkámbiu kulturál ne’ebé integrasaun rejionál oferese.
“The Sky is Ours” oferese vizaun ida ne’ebé abranjente no inspiradora kona-ba Timor-Leste nia trajetória, hodi selebra konkista sira ne’ebé alkansa ona no reafirma kompromisu atu harii futuru ida ne’ebé di’ak-liu ba jerasaun hotu-hotu.
Liu fali rejistu istóriku ida, obra ne’e hanesan sasin ida kona-ba espíritu reziliente no vizaun estratéjiku Timor-Leste nian nu’udar nasaun ne’ebé buka prosperidade no integrasaun globál.
Livru ne’e inklui poezia Mar Meu hosi Kay Rala Xanana Gusmão, prefásiu hosi Luís Amado, eis-Ministru Estadu no Negósius Estranjeirus Portugál nian, no introdusaun hosi Agio Pereira, Ministru Prezidénsia Konsellu Ministrus.
Hafoin diskursu abertura hosi Xefe Estadu, hala’o serimónia ofisiál lansamentu livru nian, ne’ebé simbólikamente Kay Rala Xanana Gusmão tesi fita, akompaña hosi reprezentante másimu hosi órgaun soberania sira.
Lansamentu ne’e hetan partisipasaun hosi Prezidente Parlamentu Nasionál, Prezidente Tribunál Rekursu, membrus parlamentu nasionál, membrus Governu, korpu diplomátiku, no responsavel sira hosi organizasaun nasionál no parseiru dezenvolvimentu sira, nomos figura importante sira seluk.
Jornalista: Hortencio Sanchez
Editór: Florencio Miranda Ximenes
