DILI, 06 dezembru 2024 (TATOLI) – Prezidente Repúblika, José Ramos-Horta, sesta ne’e, inaugura edifísiu Tribunál Primeira Instánsia Dili ne’ebé lokaliza iha Caicoli.
Iha ámbitu inagurasaun,Xefe Estadu agradese ba Prezidente Tribunál Rekursu ne’ebé durante tinan hira nia laran ka’er Tribunál Rekursu konsege halo susesu ona iha setór justisa.
“Agradese ba Prezidente Tribunál, Deolindo dos Santos tanba iha nia lideransa iha Tribunál Rekursu halo susesu iha parte balun, liuliu konsege harii edifísiu ida ne’e hodi fó fatin di’ak ba Juiz no funsionariu sira hotu atu hala’o servisu ho di’ak,” PR Horta hateten iha nia Diskursu.
Iha fatin hanesan, Prezidente Tribunál Rekursu, Deolindo dos Santos, agradese ba Prezidente Repúblika ne’ebé inaugura ona edifisiu ne’e.
“Agradese ba Prezidente Repúblika ne’ebé disponibilidade hodi inaugura ona edifisiu ne’e, agradese ba parte hotu. Edifisiu ne’e bainhira hahú konstrusaun mosu dezafiu barak liuliu problema rai, iha tempu ne’ebá mós ita hasoru pandemia Covid-19 halo servisu hotu paradu no kauza ba materiál konstrusaun balun mak to’o ohin loron foin finaliza,” Prezidente TR ne’e.
Nia dehan, maske hasoru dezafiu barak maibé la hamate espiritu empreza sira ne’ebé konstroi obra ne’e.
“Ami hotu esforsu maka’as to’o ikus susesu duni, dalabarak iha projetu balun ne’ebé la’o ho osan boot ho dezafiu barak bele aumenta osan adisionál, maibé ba konstrusaun ne’e la aumenta adisionál to’o ikus osan balun tenke fila hikas ba kofre Estadu,” Deolindo hateten.
Nia dehan, osan ne’ebé gasta ba projetu ne’e hamutuk millaun $9-resin, maibé iha kontratu inisiál ho orsamentu hamutuk millaun $10-resin ho nune’e konstrusaun ne’e halo poupansa ba orsamentu millaun $1-resin fila hikas ba kofre Estadu. Tanba projetu termina ona ho osan gasta la to’o ho montante ne’ebé tau iha kontratu inisiál.
Edifísiu ne’e konstroi hosi empreza internasionál husi nasaun Xina Economic Corporation Group Co.Ltd. Edifisiu konstrui iha tinan 2020 ba kotuk, nune’e durasaun hodi halo konstrusaun ba edifisiu ne’e durante tinan haat.
Edifísiu ne’e finaliza ho andar tolu kompostu husi sala hamutuk 100-resin mak ho sala julgamentu hamutuk 10.
Jornalista: Hortencio Sanchez
Editor: Florencio Miranda Ximenes
