DILI, 06 dezembru 2024 (TATOLI) – Prezidente Tribunál Rekursu Deolindo Santos, hateten Supremu Tirbunál Justisa hatún ona akordaun hodi deside halo estradisaun ba Arnolfo Teves Jr hodi haruka fila fali ba nia nasaun orijen Filipina.
Nia dehan, desizaun ne’e sai iha segunda (3/12) foin lalais ne’e no iha desizaun ne’e deskreve katak halo estradisaun ba Arnolfo Teves Jr hodi haruka fila fali ba Filipina.
¨Sim, akordaun ne’e deside haruka fila mas agora hanesan ohin ha’u dehan parte sira iha direitu atu halo rekursu tuir buat ne’ebé ke lei hateten¨, Deolindo Santos hateten ba jornalista sira hafoin partisipa serimónia inagurasaun edifísiu foun Tribunál Judisiál Primeira Instánsia Dili iha Caicoli, sesta ne’e.
Nia dehan, se kuandu Arnolfo la konkorda ho desizaun Supremu Tirbunál Justisa nian tuir lei Arnolfo iha direitu atu rekore desizaun Tribunál iha loron tolu nolu nia-laran.
¨Ba parte sira ne’ebé lasatisfas ba desizaun Supremu Tirbunál, iha prazu loron tolu nolu para rekore desizaun ne’e¨, nia afirma.
Iha sorin seluk, Defeza husi Arnolfo Teves JR, Advogadu Privadu, Jose Ximenes, dehan Supremu Tribunál Justisa (STJ) hatún ona desizaun hodi deside halo estradisaun ba Arnolfo Teves Jr hodi haruka fila fali
¨Sim, los duni desizaun foin sai, mais ita sei halo rekursu¨, Jose afirma.
Nia dehan, Defeza iha loron tolu nolu atu kontesta desizaun Supremu Tribunál Justisa.
¨Sim, ami sei halo rekursu hodi kontesta desizaun Supremu Tribunál Justisa ne’ebé hasoru ami-nia kliente. Ami sei prepara hela rekursu¨. nia afirma.
Ministru Justisa, Sergio Hornai, hateten hanesan Ministru Justisa seidauk simu karta ruma husi Supremu Tirbunál Justisa kona-ba desizaun estradisaun ba Arnolfo Teves Jr.
¨Ha’u seidauk simu karta ruma husi Supremu Tirbunál kona-ba kestaun ida-ne’e. Espera ke iha ona desizaun ba ida-ne’e¨, nia haktuir.
Governante ne’e hateten, pozisaun Governu nian ne’e klaru katak mantein hodi aseita halo estradisaun ba Arnolfo Teves Jr hodi haruka fila fali.
¨Ha’u halo ona desizaun iha 13 abríl fulan hirak liu ba katak halo estradisaun hodi haruka fila¨, nia konklui.
Jornalista: Natalino Costa
Editór : Zezito Silva
