Jogadór Gali Freitas la reforsa selesaun nasionál iha jogu AMEC

DILI, 07 dezembru 2024 (TATOLI) – Jogadór selesaun nasionál Timor-Leste, Paulo Gali Freitas,  konfirmadu sei la reforsa ekipa selesaun iha jogu ASEAN Musubishi Eletric Cup (AMEC) 2024 tanba nia klube atual PSIS la autoriza no konsidera jogu AMEC la tama iha ajenda Federation International Football Assosiation (FIFA).

“Ba ha’u nia maun-alin jogadór sira hotu joga di’ak. Se iha tempu atu ita hamutuk fali hodi Foti nafatin ita nia nasaun.  Situasaun agora ita hotu htene katak la’ós Ajenda FIFA no susar ba klube PSIS atu husik nia jogadór no hau nia klube mós agora iha situasaun difícil hela ha’u hnoin imi akompaiña hotu kona ba ida ne’e,” Gali tenik iha nia pajína ofisiál Facebook, ohin.

Maske la hamutuk ho nia kolega jogadór selesaun sira maibé Gali husik hela lia-menon katak “Vamos com tudo Deus Abençoes. Ha’u nia Rai Doben Timor-Leste fó fiar tomak ba imi iha lista ida Agora ne’e 100%.”

Maibé tuir informasaun ne’ebé fó sai hoUi pajina media ASEAN Football katak, jogadór Gali Freitas sei lakon pelumenus jogu rua hasoru Tailándia no Malázia hafoin hetan rekuza husi libertasaun hosi nia klube, PSIS Semarang.

Tanba ne’e, Jornalista Agência TATOLI halo kontaktu ho treinadór prinsipál selesaun nasionál Simón Elissetche deklara, loos Gali labele tuir jogu ne’e tanba nia klube atual la autoriza.

“Loos, Gali seidauk hatán atu joga ba selesaun, tanba ASEAN Mitsubishi Electric Cup la hala’o iha loron ka ajenda FIFA nian, nune’e klube sira la iha obrigasaun atu fó jogadór sira ba selesaun. Tan ne’e, ita bele hein tan ho boa-vontade, Gali sei fó sai atu joga iha jogu rua ikus kontra Singapore no Camboja,” Treinadór ne’e hateten.

Iha parte seluk treiandór Simón Elissetche hateten, jogadór Jhon Frith mós sei la joga iha jogu ne’e tanba sofre aleiza iha nia ain.

“Ohin loron ida ne’ebé difísil teb-tebes tanba ami sente la di’ak tanba jogadór Jhon Frith mós labele joga iha jogu ne’e tanba aleiza iha nia ain,” nia dehan.

Nia dehan, maske iha situasaun difisil ida ne’e la hamate vontade ba nia hanesan treinadór atu fó treinu ba jogadór sira hodi kompete iha eventu importante ne’e.

“Ami treinamentu la’o nafatin, ami iha loron rua atu hala’o treinamentu iha kampo ne’ebé atu hala’o jogu ba, fiar katak iha jogu primeiru ita kontra Thailandia jogadór sira bele hatudu rezultadu di’ak,” nia tenik.

Treiandór ne’e dehan tan, “ami hamutuk ida, no ami hakarak hatudu ba hotu-hotu katak Timor-Leste mak nasaun ne’ebé hadomi futeból no iha jogadór diak barak. Loos, ami sei lakon jogadór nain rua ne’ebé mak diak liu, maibé sira ne’ebé sei joga mós prontu ona atu kombate iha batalla.”

Tuir sorteiu ne’ebé dada ona iha fulan hira ba kotuk Timor-Leste monu iha grupu A kompostu hosi nasaun sira hanesan, Thailandia, Malázia, Sigapura no Kamboja.

Entretantu, grupu B kompostu hosi nasaun sira hanesan, Indonézia, Laos, Myanmar, Filipina no nasaun uma-na’in Vietnam.

Tuir orariu ne’ebé iha iha loron 08 fulan-dezembru Timor-Leste sei joga sei joga hasoru Thailandia. Iha loron 11 fulan-dezembru ekipa Timor-Leste sei kontra Malázia.

Enkuantu iha loron 14 fulan-dezembru Timor-Leste sei kontra Singapura no ikus liu iha loron 17 fulan dezembru ekipa Lafaek sei joga kontra Kamboja.

Lista kompletu jogadór sira ho sira nia tinan moris no klube atuál ne’ebé sira joga ba.

Guarda-rede sira:
• Georgino Mendonça (2002 – Life Football Club Kamboja)
• Junildo Pereira (2003 – Assalam FC)
• Natalino Soares (2000 – Karketu Díli FC )

Jogadór defeza sira:

• João Panji (2000 – Assalam FC)
• Francisco Costa (1995 – Assalam FC)
• Almerito Silva (1993 – AS Ponta Leste )
• Anizio Correia (2003 – Pyeongchang United  Korea Súl)
• Anizo Monteiro (1997 – Lica Lica Lemorai )
• Nelson Viegas (1999 – Greenville United Australia)
• Yohanes Gusmão (2000 – AD. SLB LAULARA )
• Sandro Lima (2003 – Assalam FC )
• Zenivio Mota (2005 – Tanjong Pagar United Singapura)

Jogadór médiu sira:

• John Frith (2002 – ISI Dangkor Senchey FC Kamboja)

• Filomeno Junior (2000 – AD. SLB LAULARA)
• Claudio Osório (2002 – )
• Santiago Xavier (1999 – Greenville United Australia)
• Fretiliano Santos (2004 – Emmanuel FC )
• Kornelis Portela (2001 – AD. SLB LAULARA )

Jogadór Avansadu sira:

• Gali Freitas (2004 – PSIS FC Indonézia)
• João Pedro (1998 – Angkor Tiger Football Club Kamboja)
• Olagar Xavier (2003 – Thimphu City FC )
• Elias Mesquita (2002 – Indera SC Brunei Darusalam)
• Mario Quintão (2004 – Emmanuel FC)
• Luis Figo (2005 – AS Ponta Leste )
• Favio Canavaro (2006 – AS Ponta Leste )
• Kenny Ximenes (2005 – Dungannon Swifts United Inglaterra)

Jornalista: Hortencio Sanchez

Editór: Florencio Miranda Ximenes