LIQUIÇA, 07 dezembru 2024 (TATOLI)– Vise-Primeiru-Ministru, Ministru Dezenvolvimentu Rurál no Abitasaun Komunitaria, Mariano Assanami Sabino, sabádu ne’e, iha Suku Mota-Ulun Postu Administrativu Bazartete Munisipiu Liquiça halo lansamentu ba atividade ekonómiku produtivu integradu.
“Ne’e aldeia ida iha área rurál ne’ebé ita define atu implementa revitalizasaun aldeia, entaun programa ne’e integradu, iha peska, hakiak ikan, hakiak boek, iha ikan nila, ikan salomão, ita mós sei transforma fatin ne’e ba fatin ema atu nani no loke fatin turizmu di’ak ida iha ne’e mak ohin ita mai lansa ne’e,” Vise PM Assanami hateten bainhira halo lansamentu ba fatin ne’e.
iha Suku Mota-Ulun Aldeia Mota-Ikun Governu planeia ona deminsaun lima ne’ebé importante mak hanesan, mudansa mentalidade oinsa fiar aan atu hamrik iha ain-leten, akumula ema partidu oioin, ema organizasaun oioin atu hamutuk haree ba dezenvolvimentu nasaun, seluk mak oinsa komunidade sira iha fatin ne’e atu hetan rendimentu no seluk tan.
“Fatin ne’e ita sei transforma sai di’ak tebes, oinsa atu hatama rendimentu rasik, ita sei halo salaun multifunsaun, sei halo fatin ba live muzika, halo mós uma ba ema sira atu deskansa, salaun ba ema atu halo festa, ita hakarak fatin ne’e sira aldeia tomak mak halo jestaun atu hatama fali osan rasik, agora programa ne’e la’o Governu mak sei apoiu osan, ba oin buat hotu di’ak ona hatama ona osan osan ne’ebé tama ne’e mak sira jere rasik no Governu la apoiu tan ona,” Assanami tenik.
Fundu ba investimentu rihun $50
Orsamentu ne’ebé Governu investe ba fatin turizmu ne’e mai husi Ministériu Dezenvolvimentu Rurál no Abitasaun Komunitaria ho montante rihun $50.
“Osan ita aloka mai ne’e rihun $50, osan ne’e la’ós mai atu mate, maibé orsamentu ne’e mai atu putar fali iha aldeia ne’e, osan ne’e la’ós de’it atu halo konstrusaun sira ne’e la’e, osan sira ne’e sei utiliza mós ba business hodi loke atividade oioin iha ne’e, sira sei halo operasaun ba produtu oioin iha tasi laran, orsamentu ne’e la’ós atu hotu entaun sira sei halo jestaun, se iha tinan 2025 sira presiza ita sei apoiu tan uitoan, bainhira sira iha reseita maka’as ona ita sei la apoiu tan hosik sira la’o mesak,” nia tenik.
PAM Liquiça agradese
Iha fatin hanesan, Prezidente Autoridade Munisipiu Liquiça, Paulino Ribeiro , agradese ba Governu sentrál ne’ebé ho inisiativa di’ak kria kampu traballu ba komunidade sira iha aldeia rurál no promove fatin turizmu iha Munisípiu Liquiça.
“Ita agradese ba dezenvolvimentu ne’ebé Governu sentrál lori to’o ona mai iha ita nia Munisipiu tun liu mai iha aldeia sira, ita nia fatin turizmu ne’ebé di’ak, Governu halo ona ita hotu tenke apoiu, ida ne’e halo di’ak mai ita nia munisipiu,” Paulino tenik.
Nune’e nia husu ba komunidade hotu iha Suku Mota-Ulun atu koopera di’ak ho Governu atu hala’o servisu hotu ho susesu nune’e bele hatama osan ba Estadu.
Iha oportunidade ne’e, nia husu ba komunidade hotu iha Munisipiu Liquiça atu labele husik animal la’o livre iha fatin públiku hodi estraga ambiente sira iha tasi ibun no estraga ai-oan sira ne’ebé kuda ona iha fatin turizmu hirak ne’ebé determinadu ona.
“Ha’u dehan kedan, animal sira ne’e tenke sulan, ita nia fatin turizmu di’ak ona, komesa dezenvolve ona, maibé animal tenke iha luhan para sulan, labele husik livre atu estraga ai-oan sira ne’ebé ita kuda iha tasi ibun sira ne’e, kada loron ami sei halo operasaun, se nia animal mak husik livre ami sei oho hotu,” nia hakotu.
Hafoin, lansamentu Assanami akompaña kedan husi Sekretariu Estadu Pekuaria, PAM Liquiça, Xefe Suku Mota-Ulun, Xefe Suku Ulmera no Xefe aldeia sira kuda nu’u-oan iha fatin turizmu ne’e.
Jornalista: Hortencio Sanchez
Editór : Florencio Miranda Ximenes
