DILI, 09 dezembru 2024 (TATOLI) – Diretór Nasionál Polísia Sientífika Investigasaun Kriminál (PCIC, sigla portugés), Vicente Fernandes Brito, hateten CAC notifika investigadór PCIC, foin lalais ne’e, hodi sai sasin ba kazu abuzu poder no iregularidade ne’ebé akontese iha PCIC.
¨Foin daudaun iha semana liu ba, investigadór 14 mak CAC notifika atu ba presta deklarasaun iha CAC sai sasin ba kazu balun ne’ebé akontes iha PCIC. Ha’u autoriza sira ba duni hodi presta deklarasaun¨, Vicente Fernandes hateten ba jornalista sira hafoin partisipa serimónia loron mudiál Anti-Korrupasaun, ne’ebé hala’o iha salaun auditoria Xanana Gusmão Ministériu Finansas, segunda ne’e .
Nia dehan, hanesan Diretór Nasionál PCIC prontu hatan, karik iha duni indísiu ruma ne’ebé indika katak PCIC suspeita duni ba abuzu poder no irregularidade.
Vicente esplika, tuir prosedimentu legal, Komisaun Anti-Korrupasaun (CAC), lei la autoriza atu notifika Diretór Nasionál PCIC.
¨CAC laiha autoridade hodi bolu ha’u tanba hau majistradu Ministériu Públiku, a não ser Ministériu Públiku mak bolu. Tanba ha’u nudar Majistradu Judisiáriu Ministériu. Ha’u hanesan Prokuradór kuandu notifika ha’u tenke tuir prosedimentu própriu ne’ebé regularize iha estatutu majistratura Ministériu Públiku nian¨, nia adianta.
Nia rejeita katak durante nia mandatu hanesan Diretór PCIC, nunka halo abuzu poder no iregularidade iha PCIC.
¨Abuzu poder akontese kuandu ha’u halo buat ruma ne’e benefisiu ba ha’u nia aan. Maibé ha’u kuandu asume kargu Diretór Nasionál PCIC, ha’u halo transparante, imparsialidade no halo tuir prinsípiu legalidade¨, nia afirma.
Nia rekorda katak desde nia asume kargu Diretór Nasionál PCIC iha 2015, jere PCIC husi zero no agora PCIC dezenvolve di’ak ona no PCIC agora nudar insitituisaun ida forte .
¨Kazu lubuk ida hanesan screaming, kazu osan millaun $42, ita halo apreensaun ida-ne’e , kazu boot, laos baibain. Kombate krime organizadu labele koalia de’it maibé servisu no servisu. Kuandu iha indísiu ruma ha’u prontu kualker oras de’it ba hatan. Ba hau nia pais ha’u kumpre¨, nia haktuir.
Hatan ba kestaun ne’e, Komisáriu CAC, Rui dos Santos, hateten CAC notifika duni investigadór PCIC ba kazu balun.
¨ Sim Ha’u hanoin kazu ne’e sei iha hela prosesu, ita iha rai ida-ne’e keixa ruma hasoru se se de’it tama iha kompeténsia CAC nian, PCIC mak sei halo investiasaun kriminál, se nian tama kompeténsia Polísia Nasionál ninia sira mak sei trata¨, nia dehan.
Nia hateten, kazu ne’e sei iha prosesu tanba ne’e CAC labele fundamenta buat balun.
¨Ha’u hanoin Komisáriu labele temi de’it ida PCIC nian ne’e. Maibé ba kazu ne’e ami sei halo prosesu identifikasaun, bolu se mak atu mai presta deklarasaun. Tanba servisu investigasaun kriminál, ita hatene ema ne’e envolve, ita presiza prova no prova ne’e mai husi testamuña sira, dokumentu sira. Ami tenke kumpre ba prosedimetu legál sira ba lei kódigu prosesu penál”, nia konklui.
Jornalista: Natalino Costa
Editór : Zezito Silva
