DILI, 09 dezembru 2024 (TATOLI) – Komisáriu Komisaun Anti-Korrupsaun, Rui Pereira dos Santos, dehan CAC simu delegsaun kompeténsia husi Ministériu Públiku (MP) hodi halo inkéritu ba kazu korrupasaun 16.
“Nudar Komisáriu, ami simu delegasaun kazu 16, iha kazu 16 ne’e prosesu lao hela, iha kazu rua mak ita finaliza ona no atu submete ba fali Prokuradór sira nudar Titulár ba prosesu ne’e oinsa sira atu haree no prepara netik buat ruma liga ho kompeténsia sira-nian hanesan Prokuradór ne’ebé kaer kazu korrupasaun atu prepara buat balun ne’ebé sei falta haruka ami presiza kompleta, entaun haruka mai fali CAC para CAC kompleta”, Rui hateten ba jornalista sira hafoin partisipa loron mundiál Anti-Korrupasaun ne’ebé hala’o iha salaun auditoria Xanana Gusmão, Ministériu Finansas, segunda ne’e .
Komisáriu CAC ne’e hateten, Komisáriu CAC lei la permite atu temi, se de’it, husi institusaun ne’ebé maibé enjeral iha kazu 16 no iha rua mak CAC besik konklui atu haruka fali ba Ministériu Públiku.
“Husi kazu balun, ohin segunda-feira ne’e ami-nia ekipa iha hela terenu hodi halo hela servisu, rekolla prova. Ha’u hanoin komisáriu labele temi institusun ABC tanba servisu investigasaun ne’e buat ne’ebé mak ita tenke kumpre ba segredu justisa nian. Sé lae bele halakon tiha provas”, nia adianta.
Nia dehan, husi kazu 16 ne’e la envolve membru Governu maibé envolve pesoál sira ne’ebé servisu nudar servidór públiku ne’ebé servisu iha institusaun Estadu sira.
“Ha’u hanoin delegasaun sira ne’ebé mai ne’e laiha kazu ruma ne’ebé mak iha ligasaun ho membru Governu sira. Maibé kazu sira ne’e mai husi ministériu A B no C ninian, prosesu sira ne’e ita tenke kumpre ba lei Kódigu Prosesu Penál, se lae nulu kuandu ita lori ba Tribunál”, nia konklui.
Jornalista: Natalino Costa
Editór : Zezito Silva
