DILI, 09 dezembru 2024 (TATOLI) – Diretór Nasionál Polísia Sientífika Investigasaun Kriminál (PCIC, sigla portugés), Vicente Fernandes Brito, hateten Ministériu Públiku (MP) seidauk delega hikas kazu transferénsia osan ilegál millaun $42 ba PCIC atu kontinua halo investigasaun.
“Kazu ne’e iha hela Ministériu Públiku. Kazu ne’e seidauk mai ami, kazu ne’e sei iha hela titular asaun penál Ministériu Públiku. Ami (PCIC) nia servisu mak halo detensaun, apreensaun depois remete ba Ministériu Públiku”, Vicente Fernandes, dehan ba jornalista sira hafoin partisipa loron mundial Anti-Korrupasaun ne’ebé hala’o iha salaun auditoria Xanana Gusmão, Ministériu Finansas, segunda ne’e .
Rekorda fali katak iha fulan-Jullu, tinan ne’e, Servisu Nasionál Intelijénsia hamutuk ho Polísia Sientífika Investigasaun Kriminál halo buska no apreensaun ba osan millaun $42 tanba deskonfia halo transferénsia osan illegál iha banku.
Ho kazu ida-ne’e, Tribunál aplika medida koasaun Prizaun Preventiva ba arguidu na’in lima ba kazu ida-ne’e hafoin rekolla fatu katak iha indísiu forte arguidu nain-lima ne’e envolve iha krime transferénsia osan illegál hamutuk millaun $42 iha Banku Mandiri.
Jornalista: Natalino Costa
Editór : Zezito Silva
