DILI, 10 dezembru 2024 (TATOLI) – Prevedór ba Prevedoria Direitus Humanus no Justisa (PDHJ), Virgílio Guterres, dehan PDHJ selebra akordu kooperasaun ho institusaun tolu hanesan Komisaun Anti-Korrupasaun (CAC, sigla portugés), Inspetór Jerál Estadu (IGE, sigla portugés) no Komisaun Funsaun Públika atu reforsa servisu iha boa governasaun.
“Hau-nia apresiasaun ba Komisáriu CAC, Prezidente Funsaun Públika, Inspetór Jerál Estadu ne’ebé ohin hamutuk ho PDHJ selebra akordu kooperasaun instutisionál. Akordu ida-ne’e atu hafoun fila fali ita-nia kompromisu uluk atu lao hamutuk liuliu atu kombate prátika sira ne’ebé ke viola governasaun, prátika sira ne’ebé ke halai ba korrupasaun no mós prátika sira ne’ebé ke halai ba direitus umanus”, Virgílio Guterres hateten iha nia intervensaun durante komemorasaun Loron Mudial Direitu Umanus ba dala 76, ne’ebé hala’o iha Timor Plaza, tersa ne’e.
Nia dehan, ho akordu ida-ne’e bele hametin liután kooperasaun servisu PDHJ ho institusaun tolu seluk ba kontrolu viola governasaun, prátika sira ne’ebé ke halai ba korrupasaun no mós prátika sira ne’ebé ke halai ba direitus umanus.
“Ita-nia kompromisu ba oin sei kontinua forte nafatin”, nia afirma.
Iha fatin hanesan, Komisáriu Komiasaun Anti-Korrupsaun, Rui dos Santos, hateten akordu ida-ne’e nudar kooperasaun instutisionál, entre PDHJ, CAC, Inspesaun Jerál Estadu no Funsaun Públika iha aspetu kontrolu ba boa Governasaun.
“Akordu ida-ne’e nudar servisu entre instituisaun PDHJ, CAC, Inspesaun Jerál Estadu no Funsaun Públika iha aspetu kontrolu ba boa Governasaun. Karik PDHJ hetan keixa korrupsaun, entaun bele enkamiña mai CAC halo nia servisu ba violasaun direitus umanus nia mak CAC hetan keixa, CAC bele rejista hodi submete PDHJ bele halo nia servisu hodi halo investigasaun ba ida-ne’e”, nia konklui.
Jornalista: Natalino Costa
Editór : Zezito Silva
