DILI, 12 dezembru 2024 (TATOLI) – Komité Independente hanesan Komité Eleitorál, Komité Étika no Disiplinar, Komité Auditória no Konformidade inklui Komité Rekursu iha Federaasaun Futeból Timor-Leste (FFTL) anúnsiu ofisiál ba rezultadu husi prosesu selesaun kandidatura ba kargu Prezidente FFTL no Membru Ezekutivu FFTL.
“Durante ne’e ita iha kandidatura na’in-rua mak submete ona dokumentu, entaun ohin ami tenke anúnsiu ba públiku. Kandidatura ba Prezidente FFTL mandatu restante 2022-2026 mak hanesan, Nilton Telmo Gusmão dos Santos no Estanislau António Baptista”, Prezidente Komité Eleitorál, Reinaldo Fernades Luis hateten liuhusi konferénsia imprensa ne’ebé hala’o iha salaun Xanana Sport Centre Dili, kinta ne’e.
Alende ne’e, iha mós kandidatura ba membru Ezekutivu FFTL mandatu restante 2022-2026 mak hanesan, Domingos dos Santos Caero, Kandidatu Potensial ba Membru Ezekutivu FFTL no Augusto Henriques,
“Ami hakarak parabeniza ba kandidatu hotu-hotu ba esforsu hodi bele kompete no iha vontade dedikasaun ne’ebé hatudu iha prosesu ida-ne’e. Ami hakarak fó haksolok katak sira ne’ebé sei eleitu iha Kongressu Ordinariu mai, iha kompromisu no vizionariu atu lidera FFTL ba futuru ne’ebé bo’ot ho progresu no susesu iha dezenvolvimentu futebol iha Timor-Leste,” nia tenik.
Tanba ne’e, Komite Independente agradese ba Públiku liuliu amante futeból, Asosiasaun, Federasaun no klube sira ne’ebé iha fiar ba Komité Independente, atu hala’o prosesu ida-ne’e ho Independentemente, ho integridade no justa.
Molok to’o Kongressu Ordináriu, nia dehan komité independente sira sei notifika kandidatura sira hodi prepara-an
“Ami-nia kompromisu atu promove demokratizasaun no kontribui futeból hanesan meiu ba unifikasaun, dezenvolvimentu no orgullu nasionál. Hamutuk, ami sei kontinua atu fortalese desportu ida-ne’e no inspira jerasaun sira ne’ebé mai,” Reinaldo hateten.
Janeiru 2025 realiza kongresu FFTL
Komité eleitorál liuhusi kongressu extraordináriu iha loron 26 Outubru tinan 2024. Bainhira Komité haat eleitu, kontinua kedas ezerse nia kna’ar, ba faze preparasaun kongressu ne’ebé sei realiza iha loron 11 Janeiru 2025.
Tuir Estatutu FFTL no Kodigu Eleitorál edisaun 2024, Komité Eleitoral Notifika ba Membru Assosiasaun sira iha loron 13 novembru 2024 (Estatutu FFTL Artigu 32. Alina 2), hodi bele submete kandidatura potensia ba vaga Prezidente FFTL no Membru Ezekutivu nain ida.
Loron limite kandidatura nian 28 novembru 2024, (Codigo Eleitoral FFTL, Artigu 9, alina 2) lha tan prazu loron lima (5) nia laran hahú husi prazu submete formulariu kandidatura – iha loron 29 novembru to’o 03 Desembru 2024 (Codigo Eleitoral FFTL, Artigu. 9, alina 3), kuando kandidatura nia dokumentu relevante seidauk kompletu bele kompleta dokumentu tuir prazu ne’ebé determina.
Nune’e, Komité Eleitoral fó tan loron tolu ba kandidatura sira atu kompleta sira nia aplikasaun, iha prosesu aplikasauan ne’e, depois verifikasaun, iha duni kandidatura ida mak nia dokumentu hanesan Planu no Programa submete ikus hodi kompleta haktuir rekejitus ne’ebé iha.
Haktuir ba Anexo A nu. 6 hatete katak kandidatura sira kuandu passa liuhusi verifikasaun integridade ne’ebé realiza husi komité auditoria e konformidade no Komité Étika e Disiplinar molok selesionadu, Komité Eleitoral entrega dokumentu kandidatura nain-haat, kandidatu Prezidente na’in-rua no kandidatu Membru Ezekutivu nain rua, hafoin komité rua halo verifikasaun integridade entrega hikss ba Komité Eleitoral halo Validasaun.
Jornalista: Hortencio Sanchez
Editór: Florencio Miranda Ximenes
