MAE hahú distribui uniforme ba xefe suku sira
DILI, 12 dezembru 2024 (TATOLI)–Diretór Jerál Governasaun Lokál iha Ministeriu Administrasaun Estatal (MAE), António Guterres, hateten Governu hahú distribui ona uniforme ba xefe suku sira iha munisipiu sira no hahú distribui ba munisípiu Ataúro iha semana ida-ne’e nia laran.
“Uniforme ne’e ita fahe ona iha Ataúro no ita fahe iha Rejiaun Administrativu Espesiál Oé-Cusse. Kompañia fornesedór sira mós hato’o tan atu fahe iha Baucau,” diretór Jerál ne’e hato’o ba Agência Tatoli, liuhosi telefónika, kinta ne’e.
António Guterres garante, uniforme sira-ne’e sei distribui ba munisipiu sira seluk, bainhira hotu ona mak fahe ba xefe suku sira iha Baucau.
Prezidente Autoridade Munisipal Ataúruo Mateus Belo, hateten xefe suku sira Ataúro simu ona uniforme no motorizada.
“Foin lalais ne’e, ami distribui ona uniforme ba xefe suku sira ho prezensa Governu lokál inklui mós motorizada hotu,” nia dehan.
Motorizada ne’ebé xefe suku sira simu ne’e ho kondisaun di’ak hotu de’it, maibé uniforme sira fahe ba autoridade lokál sira.
MAE husu autoridade sira aprezenta relatoriu kona-ba motorizada aat
Aleinde ne’e, Diretór Jerál Governasaun Lokal iha Ministeriu Administrasaun Estatal (MAE), António Guterres, husu ba Autoridade lokál no Munisipál atu aprezenta relatoriu kona-ba motorizada ne’ebé mak simu ho kondisaun aat.
Nia fó apelu relasiona ho motorizada rua (2) ne’ebé Governu fó ba ba xefe sira ne’ebé aat iha munisipiu Covalima nian no iha momentu ne’ebá nia mak ba halo distribuisaun maibé laiha reklamasaun ruma iha oin.
“Instrusaun ne’ebé mak ita fó ba sira-ne’e katak banheira iha motorizada balun tergores ka riska ruma ka la moris tenke relata ba diretór asuntu sosiál no Autoridade Munisipál hodi hato’o mai iha diresaun Governu lokál hodi halo despaixu diresaun nasionál apoiu lojistika atu hato’o ba kampana fornesedór,” diretór ne’e hateten ba Tatoli liuhusi telefónika.
To’o agora seidauk simu relatóriu ruma kona-ba motorizada sira aat iha munisipiu sira inklui mós Covalima nian.
“Ita servisu iha instituisaun Estadu presiza iha relatóriu ida bazeia ba evidensia, labele konta istória de’it,” nia dehan.
Nia esplika, kompañia fornesedór mak Empreza Bandidu Qualidade ne’ebe fó garansia ba troka óleo banhiira halai kilometrajen 1000.
Maibé, diretór ne’e hateten, se iha avaria ruma ba ekipamentu no aparellu ruma motor nian hanesan bela ka batria, molok sira simu empreza fornesedor bele hare.
Diretór haktuir motorizada ne’ebé aat iha xefe suku sira nia liman, depoizde simu, ida-ne’e responsabilidade sira-nian.
Jornalista : Jesuína Xavier
Editór : Cancio Ximenes
