DILI, 12 dezembru 2024 (TATOLI)- Prezidente Repúblika, José Ramos-Horta, kinta ne’e, iha Palásiu Prezidensiál Dili kondekora Medalla Méritu prestijiozu ba mídia nasionál 12 hodi valoriza sira-nia kobertura esepsionál ba Sua Santidade Papa Francisco nia vizita Apostólika dahuluk mai Timor-Leste iha loron 09 to’o 11 Setembru 2024.
Medalla Méritu, ne’ebé estabelese tuir Dekretu-Lei númeru 15/2009, rekoñese kontribuisaun sira ne’ebé destakadu hodi hametin orden sosiál no promove pás no estabilidade nasionál.
Mídia onrada sira hatudu profisionalizmu ezemplár iha sira-nia kobertura komprensivu kona-ba Vizita Papal, hodi fahe okaziaun importante ida-ne’e ho mundu no dokumenta fiar kle’an povu timoroan nian.
“Kobertura kle’an no profisionál ne’ebé fó husi ami nia mídia estatál no privadu sira durante Papa Francisco nia vizita hatudu la’ós de’it signifikadu istóriku husi okaziaun ne’e maibé mós kompeténsia no dedikasaun esepsionál husi jornalista sira iha ita-nia nasaun,” PR Horta tenik iha nia deiskursu.
Xefe Estadu dehan tan: “sira nia servisu garante katak eventu importante ida-ne’e prezerva ba jerasaun sira iha futuru no partilla iha nivel nasionál no internasional.”
Mídia nasionál sira ne’ebé mak simu Medalla Méritu no sertifikadu rekoñesimentu mak hanesan;
- Rádiu no Televiza un Timor-Leste, Empreza Públika (RTTL, E. P.)
- Ajénsia Notisioza TATOLI, I.P.
- Grupu Mídia Nasional (GMN)
- Televizaun Edukasaun Timor (TVET)
- Suara Timor Lorosa’e (STL)
- Diário Timor Post
- Jornál INDEPENDENTE
- Dili Post
- SMNews
- Hatutan.com
- Fornesedór Informasaun Vídeo (VIP TV)
- Lafaek News
Editór Ezekutivu Agência TATOLI agradese
Bainhira hetan kondekorasaun, Editór Ezekutivu Agência TATOLI. Institutu Públiku, Rafael Ximenes de A. Belo, agradese ba Prezidente Repúblika ne’ebé atribui ona Medalla ba Tatoli hodi rekoñese Tatoli nia kontribuisaun.
“Uluk nanain hakarak agradese ba Maromak liuliu ba públiku ne’ebé mak durante ne’e depozita ona konfiansa ba mídia hotu inklui Tatoli, reprezenta Tatoli agradese mós ba ekipa ne’ebé durante ne’e nia kontribuisaun maka’as tebes mak lori satisfasaun ba públiku atu asesu ba informasaun,” Rafael hateten.
Nia dehan, durante ne’e ekipa Tatoli serbisu másimu tebes mak halo kobertura ho susesu ba vizita Sua Santidade Papa Francisco mai Timor-Leste.
“Ida ne’e orgullu boot ida ba ita timoroan, orgullu ida mós ba ita iha Tatoli. Medalla ne’e meiu ida atu motiva ita atu serbisu di’ak liutan ba oin,” nia tenik.
Entrega prémiu ba fotografer sira
Iha serimónia ne’e, Prezidente Ramos-Horta mós entrega prémiu ba manan-na’in sira husi konkursu fotografia Vizita Papal nian mai Timor-Leste. Manan-na’in sira mak:
Prémiu Dahuluk simu osan $1,250 mak Lirio da Fonseca. Prémiu Daruak $1,150 Eugenio Pereira da Silva. Prémiu Datoluk $950 mak Antonieta Freitas Sequeira. Prémiu Dahaat ho montante $850 mak Eugenio Pereira da Silva, no Prémiu Dalima ho valór osan $750, mak Lirio da Fonseca.
Hafoin serimónia entrega prémiu, Prezidente Ramos-Horta inaugura espozisaun foto iha salaun Papa Francisco.
Espozisaun ne’e dokumenta Sua Santidade Papa Francisco nia Vizita Apostóliku Dahuluk mai Timor-Leste no inklui fotografia vensedór sira.
Espozisaun Foto ne’e sei loke ba públiku husi loron 13 to’o 20 Dezembru 2024, iha Palásiu Prezidensiál
Jornalista: Hortencio Sanchez
Editór: Florencio Miranda Ximenes
