DILI, 12 Dezembru 2024– Prezidente Republika (PR), José Ramos-Horta ho Primeiru-Ministru (PM), Kay Rala Xanana Gusmão , halo abertura ba feira povu nian ne’ebé organiza husi Ministériu Komérsiu no Indústria (MKI) no mós Kompetisaun Prezépiu Natál 2025 ne’ebé organiza hosi Prezidénsia Repúblika, iha resintu Palásiu Prezidente Nicolau Lobato, Bairru-Pité.
Bainhira hala’o abertura Primeiru-Ministru hato’o parabens ba inisiativa husi Prezidente Repúblika hodi hamosu ideia bá kompetisaun ida ne’e atu hanorin Timoroan hotu hadomi malu no hadomi nasaun.
“Ita tenke hatudu katak ita iha duni fé. Tanba ne’e mak ita tenke hadomi malu, ita tenke ajuda malu no ita tenke hadomi rai ida-ne’e. Prezidente Repúblika fó ezemplu boot tebtebes ida atu ita bele hadomi rai ida-ne‘e no hadomi povu ida-ne‘e. Parabéns bá Prezidente Repúblika,” Primeiru-Ministru hato’o iha nia intervensaun, kinta kalan.
Xefe Governu hato’o mós parabéns bá joven sira ne‘ebé mak halo prezépiu ne‘ebé furak tebtebes.
“Labarik ki’ik-oan sira mós halo buat lubuk ida iha ne‘ebá. Hatudu katak, hosi kiik sira mós iha hanoin. Sira-nia liman mós halo, hodi hatutan saida mak iha sira-nia fuan no sira-nia kakutak,” Xanana Gusmão hateten.
Ikus liu hato’o parabéns bá ema hotu-hotu, husu boot katak, se-se mak mai vizita iha-ne’e, mai ho sentimentu armonia, sentimentu unidade no sentimentu domin ninian hodi to’o iha 31 fulan dezembru haksolok duni hodi simu tinan 2025.
Kompetisaun Prezépiu ne’e mós Prezidénsia Repúblika realiza ona iha tinan kotuk nu’udár atrasaun turístika relijiozu ne’ebé úniku hodi atrai sarani Katóliku hosi nasaun seluk mai vizita Timor Leste.
Kompetisaun bá prezépiu ne’e partisipa hosi suku sira mak pertense bá munisípiu Díli nian, atu fó valór bá atividade relijiozu sira, hodi atrai turista sira vizita Timor-Leste barak liu-tán.
Prezépiu ne’e ekipa juri sei halo avaliasaun bazeia bá kreatividade, orijinalidade no kapasidade atu transmite mensajen Natál nian no mensajen domin nian.
Partisipa iha serimónia abertura ne’e mak hanesan, Arsebispu Arkedioseze Metropolitana Dili, Dom Virgílio Cardeal do Carmo da Silva, SDB, Ministru Komérsiu no Indústria, Filipus Nino Pereira, membru Governu balun, Korpu diplomata sira no komunidade.
Jornalista: Hortencio Sanchez
Editór: Florencio Miranda Ximenes
